قصيدة"مين اللى طالع يحضن الميادين" لـ "مصطفى الجارحى"

مين اللى طالع يحضن الميادين
يشبه جنون القلب لو مفتوح
يشبه عيون الروح ندى وياسمين
ينزف دماه الطاهرة نور ع الأرض
وكأنها ساجدة تصلى الفرض
وتنادى: عيش حرية للمساكين
مين اللى طالع يحضن الميادين
.............
البنت قالت يا ولد يالاّ
مسلم مسيحى شاب طفل عجوز
الشمس من بين السحاب طالة
والحُر لو تحت التراب بيفوز
البنتى قالت مش هسيب حقى
ياخطوتى بين الجروح شقى
ده اللى استباحنى دبحنى بالسكين
مين اللى طالع يحضن الميادين
..........
إدانى إبنى درس فى الوطنية
وادتنى بنتى محاضرة فى الأخلاق
قادت فى دمى زهور سنين مطفية
وفردت عودى من هنا لبولاق
شفت الولاد يتدفوا بالهتافات
علبال ما رجلى خدتنى للكيت كات
كان الولاد بيغنوا منتصرين
مين اللى طالع يحضن الميادين
..........
بينى وبينكم دم قايد نار
يا معششين فى الليل حدادى وبوم
يا سارقين النبض م النوار
ومخليين صوت الفراش مكتوم
بينى وبينكم تار مالوش ديَّة
هفضل أنادى يا مصر حرية
خدى نور عنيَّا وحررى المساجين
مين اللى طالع يحضن الميادين
..........
تونس وليبيا ويمن سوريا مع البحرين
ثورة ربيع العرب ولكل شعب ميدان
يُشعل شموس الغضب فى حناجر الملايين
وينادى: آن الأوان نعلى شأن إنسان
وأنت لأول مرة تكون على مسمى
تحرير بجسم وروح بيجمَّع الأمة
ويقول "هنا القاهرة" ردوا يا مصريين
مين اللى طالع يحضن الملايين
..........
الله عليكى وأنتى مالكة البصيرة
شايفة بعين أحمد حرارة زى زرقا اليمامة
وهبتى دمك فدا وفرشتى قلبك حصيرة
وآمنتى إن الولاد هيوصَّلوكى بسلامة
لو سالى زهران تغنى يرد "مينا" بهتاف
لاتنين سوى نزفهم للمجد فوق الكتاف
قمرين فى عز الشهادة بيعدلوا الموازين
عرفتوا مين اللى طالع يحضن الميادين