د. صبرى أسماعيل يكتب: الهرم بُركان

فتحوا المقابر مالتقوش حفرة---------ولا حتّى لقيوا للولد أكفان
والنعش لامس قلبه للذكرى--------والقطن عاتب زهرة الكتّان
والدمع زاحف ع الشقوق جايز---يلقى ف جبينها مخزن الأحزان
والميّه طالعة م البحور تجرى-------شادّة وراها هوجة الفيضان
ميّل عليها حيّنا وسلّم----------أتاريها خانت والأمل خوّان
تطوى غيطان القمح ماتطاطى------وتعود أبيّة زى عهد زمان
والدم يِغلى فى العروق ساعة----ويسيل على عود القصب أزمان
ياخد فى حُضنه الرملة ف جِبالها------وكأنّه شارد مننّا وزعلان
يرسم على غصن الشجر غِنوة------الحُزن فيها ملحمة وعنوان
ماتشِدّى حيلك يابلد قومى-------طول عمرك انتى زينة البِلدان
من يومك انتى يابلد جامدة-------تروينا وانتى تشتكى الحِرمان
بتلمّى شالك تاج على راسك----يحميكى م اللّى يشترى الأشجان
إن شين يصيبك تصبرى دايما----دا السِلم طبعك والشِعار إيمان
إن باغى قرّب وانتوى يضرّك------شاف الهوايل والهرم بُركان
شاف العروبة كلّها فيكى-------والنيل بيرمى الظلم بالطوفان