قاتل قواد بولاق الدكرور: غرست السكينة فى رقبته بعد ما أجبرنى على توقيع إيصالات.. «الأسطى محمد»: تعرفت على المجنى عليه منذ 5 سنوات ولقيته بتاع نسوان ولما ابتزنى حرمته من الحياة

خلف القضبان، داخل الزنازين بأقسام الشرطة والسجون تكمن الحكايات، عشرات من البشر، كل منهم له روايته بتفاصيلها الدقيقة، تستحق كل منها صفحات لنشرها، إحدى هذه القصص نتناولها على لسان بطلها فى هذا العدد.. سائق تاكسى بسيط الحال، ليس له مصدر رزق سوى عمله الذى يتكسب منه قوت يومه، يتقاضى أجره نهاية كل ليلة من صاحب السيارة التى يعمل عليها، متزوج منذ سنوات وله من الأولاد خمسة، حين يحدثك تراه هادئ الطباع، لا يوحى حديثه بأنه تحول إلى مجرم.

المتهم بذبح صديقه يتحدث لمحرر اليوم السابع

«محمد. ب» البالغ من العمر 43 عاماً والمتهم بذبح صديقه القواد «صبحى. ع»- 60 سنة- سمسار سيارات، داخل شقته بمنطقة بولاق الدكرور، تحدث عن الدافع وراء ارتكابه الجريمة وكيفية تخطيطه لتنفيذها منذ شراء السكين وحتى تخلصه من المجنى عليه بذبحه، قال لـ«اليوم السابع»: «أنا بنى آدم بسيط، شغال على تاكسى مش بتاعى، ربنا بيرزقنى كل يوم وبروح لمراتى وأولادى باللى فيه النصيب، راضى بحياتى وعمرى يوم ما اعترضت، عندى 5 عيال عايش علشانهم.. كنت قاعد على القهوة من حوالى 5 سنين، اتعرفت على شخص شغال سمسار سيارات، كان اجتماعى وبيتكلم مع الناس كلها، ومن ساعتها أصبح بينا علاقة صداقه، كنت محافظ عليها علشان لو سبت العربية اللى شغال عليها يساعدنى فى الحصول على عمل باعتباره سمسار».

وأضاف المتهم من داخل محبسه بقسم بولاق الدكرور: «بعد ما توطدت علاقتنا عرفت منه أنه بيجيب ستات فى الشقة بتاعته، وعرض عليا أنى لو عايز أمارس الجنس مع أى واحدة مقابل 100 جنيه بس فدا متاح.. فى البداية كنت رافض لكن بعدها ضعفت وطلبت منه أنه يدبر لى لقاء مع واحدة من الساقطات اللى بيجيبهم، وبالفعل نفذ ومارست الجنس مع ساقطة فى شقته والموضوع تكرر بعد كدا، كنت لما أحس إنى نفسى فى الموضوع دا أتصل بيه وألاقيه جاهز على طول».

الجانى ذكر أنه متزوج ولديه 5 أبناء لا عائل لهم غيره

وتابع السائق: «المجنى عليه كانت سمعته سيئة، والناس كلها اللى بيقعدوا على القهوة عارفين أنه «قواد» وبتاع نسوان، وفى مرة كنت قاعد على القهوة واتكلمت مع واحد صاحبى وقلت له إن سمسار العربيات بيجيب ستات فى شقته وبياخد فلوس، وبالرغم من أن الناس كلها بتتكلم فى حقه بالعيب كلامى وصل له، وفوجئت به فى يوم بيتصل بيا وبيقول لى لازم تيجى الشقة حالاً عشان فيه مصلحة، ولما رحت لقيت معاه اتنين بلطجية وأجبرنى على توقيع إيصالات أمانة وقالى الإيصالات دى عشان تحرم تتكلم فى حقى وأوعى تجيب سيرتى تانى».

وواصل المتهم: «منذ أن أجبرنى على توقيع إيصالات الأمانة وهو بيذلنى، وبياخد منى فلوس كتير، وبيجبرنى أنى أوصله بالتاكسى ببلاش، لحد ما الشيطان لعب فى راسى وقررت أتخلص منه، رُحت لمحل أدوات منزلية واشتريت سكينة، واتصلت بيه وطلبت يجهز لى مصلحة «ساقطة» من الستات اللى بيجيبهم، لقيته بيقول لى تعالى حالاً، رحت قابلته فى الشقة، فطلب منى أشترى له كارت شحن تليفون، وبعدين عمل كوبايتين شاى، واتصل بالساقطة اللى هتيجى.. كانت الساعة حوالى 4 عصراً، الست قالت له أنا هاجى على الساعة 7 عشان مش فاضية دلوقتى».

واستطرد المتهم: «اطمنت لما عرفت أن الساقطة مش هتيجى دلوقتى، وحسيت إن الفرصة مناسبة أنى أتخلص منه، كنت قاعد جنبه على الكنبة، ومفيش حد غيرنا فى الشقة، فطلعت السكين اللى كنت مخبيها فى الجاكيت اللى كنت لابسه، وغرستها فى رقبتها وشيلتها، لقيته وقع على الأرض ومات منطقش بكلمة واحدة، فتشت هدومه لقيت المحفظة وبداخلها إيصالات الأمانة بتاعتى وشوية ورق، خدت المحفظة والسكينة وتليفونه المحمول وهربت من المكان، التاكسى بتاعى كان مركون بالشارع، ركبته ورحت على النيل رميت فيه السكينة والمحفظة والإيصالات والتليفون».

وقال المتهم: «بعد ما نفذت الجريمة واتخلصت من السكينة وباقى الحاجات فى النيل، حسيت إن الموضوع هينكشف، وهيتقبض عليا، لكن أنا مليش مكان أهرب فيه، قلت أرجع لبيتى وأقعد وسط عيالى واللى يحصل يحصل، ورجعت وبعدها بيوم لقيت صاحب التاكسى اللى أنا شغال عليه بيتصل بيا وبيقول لى عايزك، وقتها أنا اتأكدت أن الموضوع اتكشف، لكن طلبت منه أن الموضوع يتأجل لبكرة، وفى نفس اليوم بالليل لقيت صاحب التاكسى بيقول لى أنا تحت بيتك وأنزل حالاً عايزك، ولما نزلت لقيت ضباط المباحث قبضوا عليا، واعترفت بكل حاجة عشان مش بحب الإهانة، ومش عايز حد يمد إيده عليا، والضباط عاملونى كويس الصراحة».

وأنهى المتهم حديثه لـ«اليوم السابع»: «أنا غلطت فعلاً وأستحق اللى يحصلى، لكن القتيل كان يستحق كدا، كان بيذلنى بالإيصالات، مش مشكلة أنا أستاهل اللى يحصلى، لكن شايل هم مراتى وولادى الخمسة، ملهمش حد غيرى، ومش عارف هيعيشوا إزاى».

الجريمة التى تم كشف غموضها قبل مرور 48 ساعة على ارتكابها تلقى بها اللواء محمود فاروق، مدير الإدارة العامة لمباحث الجيزة، بلاغاً بمقتل سمسار سيارات داخل شقته ببولاق الدكرور، فأشرف على فريق بحث وتوصلت تحريات العميد على عامر رئيس مباحث قطاع غرب الجيزة، والعقيد عبدالوهاب شعراوى، مفتش المباحث الجنائية، والمقدم طارق حمزة، وكيل المباحث، إلى أن المجنى عليه كان يتردد على الشقة بمفرده وفى بعض الأوقات تصاحبه عدد من السيدات والرجال.

كما توصلت التحريات إلى أن المجنى عليه موظف بالمعاش ويعمل سمسار سيارات، وأن الجانى استخدم سكينا فى ارتكاب الجريمة، حيث تبين من خلال المعاينة إصابته بجرح ذبحى بالرقبة.

المتهم اعترف بتفاصيل الجريمة والنيابة حبسته على ذمة التحقيق

وبتكثيف التحريات توصل المقدم هانى الحسينى، رئيس مباحث قسم شرطة بولاق الدكرور، إلى أن المتهم هو «م. ب» سائق تاكسى، حيث تربطه علاقة صداقة بالقتيل، وكان يمارس الرذيلة مع الساقطات داخل شقته التى شهدت الجريمة، فألقى رجال المباحث القبض عليه وباعترافه حرروا له المحضر اللازم وأحالوه إلى النيابة العامة فأمرت بحبسه احتياطياً على ذمة التحقيق.