بهاء الدين محمد يكتب: أسف يا أمى

بحبك يا أغلى وأعز الحبايب
ومش حقدر أبعد عنك ثوانى
يا أجمل وأطيب أم ف حياتى
وجودك ف قلبى ده أغلى الأمانى
ده من يوم ولادتى وأنا نزلت أصرخ
مسحتى دموعى بأحلى ابتسامة
ف شدة آلامها وكات تيجى تسأل
ده ابنى حبيبى وجه بالسلامة
سهرتى ليالى كتير جنب منى
وشلتى همومى وواخدة القرار
فتسقينى فرحة وضحكة يوماتى
وأنا كنت بسقيكى دايما مرار
كانت تيجى دايما تقولى يا ابنى
ماتسمع كلامى وذاكر دروسك
تعالى يا سندى ف حضنى شوية
يا خوفى عليك م الحياة لو تدوسك
ده أنت امتدادى وسندى ف حياتى
وأنت ابتسامتى وأملى الوحيد
نجاحك نجاحى وثمرة كفاحى
أشوفك يا ابنى فى فرحك سعيد
كبرت يا أمى ومبقتش سندك
وقعدة صحابى بقت أحلى عيشة
وبسهر يوماتى ف حضن القهاوى
وهات يا ابنى طاولة ورصلنا شيشة
وسيبتك يا أمى ومبقتش بسأل
وزادت عليا هموم الحياه
وزادت مشاكلى والحزن داقنى
دعاكى يا امى ده طوق النجاة
آسف يا أمى
خدتنى حياتى لموجة بعيدة
وتهت ف غيابك ف بحر الهموم
وبركة دعاكى حامتنى يا أمى
من شر نفسى وشر العيون

خدينى ف حضنك وضمينى تانى
بحبك يا أمى بكل اللغات
يا أجمل وأطيب أم ف حياتى
حعيش جنب منك لحد الممات