عبد الباسط محمد يكتب: مشكلتنا

مشكلتنا مش رئيس
ولا نائب برلمان
مشكلتنا إزاى نعـيش
حياتنا مع بعض ف أمان
نقسـم اللقمة الشريفة
بينا على قد العرق
نحمى م الأيد الخفيفة
خير بلدنا اللى أتسرق
مانطاطيش ف الحق رأسنا
مانساومش على افتراسـنا
اتفـقنا أو اخـتلفـنـا
ماتميلش كفة الميـزان
مشكلتنا
شعب واهـم أنه فاهــم
كل حاجة وهى طـايرة
مخه عقله دار معارف
غيره ديما سـلعه بايـرة
وأن كل الناس وراه
بعد منه ف الصـــــدارة
حقه يشهـدله ومعــاه
حتى لو كان ف الخسارة
كل واحد من هـــواه
ماشى عكـس الاتجاه
واللى مش وياه معـاه
تبقى دى خيانة ومؤامرة
مشكلتنا
حـبنا للنفـس شـىء
فوق مانتصور يكون
فـردنا مظلـوم بـرىء
كلنا فــوق القانـون
علو صوتنا ف كل أزمة
مالها لازمة بتقابلنا
والتباهى بكل عظمة
الكون كأنه مافوهش غيرنا
مسنودين على أمس ماضى
يوم حاضرنا كله فاضـى
كله حاكـم كله قاضى