سامح لطف الله يكتب: عيشة أهلى

عايزانى أعيش عيشة أهلى
من عز الزجمة بتندهلى
ومطنش جى وعلى مهلى
من بكرة تشوفى وتستاهلى

بوتاجازك ده ولا له لزمة
وكانونى دا كافى للأزمة
وعنيكى تدمع ولا بسمة
ودى واحدة من عيشة أهلى

والدش هفكه من بكرة
والباب راح أشيل منه الأكرة
وبدالها العصفورة على فكرة
وتعيشى لفترة عيشة أهلى

والمية السخنة والباردة
والبانيو المرسوم بالوردة
والطشت كفاية والعدة
ووابور الجاز كده تستاهلى

والزير وكفاية والقلة
واللمبة الجاز زى الفلة
عربية تدور بالمانفيلة
ودى حبة من عيشة أهلى

عايزانى أعيش عيشة أهلى
من عز الزجمة بتندهلى
ومطنش جى وعلى مهلى
من بكرة تشوفى وتستاهلى