سامح لطف الله يكتب: البندر عيشته كئيبة

الدفتر لسه بحاله
مليان حكايات حبيبة
ويوماتى تقوم صبّاحى
تظهر حنية وطيبة
بدفاها تلم الدنيا
دا البندر عيشته غريبة
ولا حد عليك بيشقر
والوحدة يا روحى كئيبة
دا حياة الريف محلاها
واللمة فى أى مصيبة
والفرح بطعم الدنيا
م القلب ما فيهشى الريبة
ولا عمرك يوم هتصدّع
وتشرب بلابيع تركيبة
ودكاترة تقول لك نفسى
أمراض بالوهم وخيبة
على إيه فى البندر عيشتك؟
والخيبة معاك بالويبة
الخطوة عليك محسوبة
ولا بركة مع الحسِّيبة
يعنى اللى يخش يمينك
والديب هيقش نصيبه
وتعالب من ورا ضهرك
تاخد ولا تعرف عيبة
ويقولوا عليك واد جلدة
والسيرة نميمة وغيبة
والله لو أقدر أرجع
لحياة الدفا والهيبة
وآكلها بمش ودقة
وأخرج من دوشة عصيبة
واتمشى هناك ع الترعة
دا البندر عيشته كئيبة
وأشم الهوا وبراحتى
وأحرج من خنقة غريبة