محمد أبو نازل يكتب: أنا العاشق

صحيح قلبى ما داب أبدا مع العشاق
ولا نمتش ف عينى دمعة المشتاق
ولا رسمتش قلوب الحب فى الكراريس
ولا كتبتش ب قلمى يوم عن الأحاسيس
ولا شلتش فى كتبى وردة دبلانة
ولا صالحتش فى عمرى واحدة زعلانة
لكن عاشق
أنا عاشق ومن نوع خاص
عاشق للحب والإحساس
عاشق أمى اللى سهرانة عشان فى الفجر تدعيلى
عاشق أيامى وسنينى وشباب جيلى
عاشق بنتى وهى بتجرى على حضنى عشان هاتنام
عاشق كل كلام الحب فى الأفلام
عاشق بلدى وبحلم يوم ما العدل فيها يعود
عاشق غنوة بلحن فريد وصوت العود

ما أنا العشاق برغم انى
ما تهتش يوم مع العشاق
ولا نمتش ف عينى دمعة المشتاق