محمد خميس يكتب: وبعشق رنة التليفون

وبعشق رنة التليفون
تنور الشاشة برقمها
وبجرى بلهفة المجنون
عشان الحق أكلمها

يجينى الصوت نسيم نادى
يتوه القلب فى كلامها
ألو تقولها بصوت هادى
يدوب قلبى مع نغمها


وتبدأ تعزف الألحان
وتتكلم بحس ملاك
واحشنى يا ساكن الوجدان
وأخبار الحياة ايه معاك


تقول طمنى على حالك
وريح نبض قلبى عليك
ولما اسكت تقول مالك
تقول فيه حاجة شاغلة عينيك


وابدأ احكى تفاصيلى
واسمع منها حكاويها
وعن سهرى فى طول الليل
ودقات قلبى تناديها


وييجى فى بالى انرفزها
واكلمها على فلانة
بغيظ تقولى أبروزها
وهاحبسها فى زنزانة


ويعلى صوتنا بالضحكة
بدوب أصلاً فى ضحكتها
وبشكى من نيران شوقها
وبتمنى ف رؤيتها


وننهى كلامنا فى التليفون
والقلب مليان بأمانى
وبفضل أشبه المجنون
لحد ما تتصل تانى