أنت ونصيبك..رواد محاكم الأسرة: "الجواز عربية يا تخبطك وتموت تدخل جنة يا نار".. رباب: "بطختى طلعت قرعة"..وكريمة: "الملافظ سعد بس سعد انتحر لما اتكلم مع جوزى".. وخبيرة: الارتباط أصعب خطوة يتخذها الإنسان

تعتبر جملة "دبلتين وخطوبة جربوا مش هتخسروا حاجة"، الأبرز التى يوهم بها الأهالى والأقارب والأصحاب والأحباء العروسين، وبعدها لن تراهم وأنت واقف مع شريكتك أو شريكك أمام محاكم الأسرة، تحاولوا تصحيح خطأ يقضى على سعادتكم، لذا إن قررت الزواج فكن واثقا كل الثقة "اختاروا اللى شبهكم وريحوا نفسكم وريحوا المجتمع أثابكم الله".

يعرض "اليوم السابع" بعض من الحالات اتخذوا قرار الزواج دون تروى، وفى البداية قالت "داليا.ن" بدعوى الطلاق بمحكمة الأسرة بمصر الجديدة رقم 13674لسنة 2014، "مشكلتى بدأت بسبب محاولتى التحصل على أكبر قدر من العلم، وأهمالى فى حياتى ووللاسف أسلوبى معجبش أهلى ولا صحابى، وبدأ الزن على الودان، وسؤالى هتجوزى أمتى كل دقيقه، وحجتهم عايزين نفرح بيكى ياموكسه، وأتنيلت وسمعت كلامهم منهم لله، وكنا أنا وزوجى مبنستحملش نقعد مع بعض دقيقه، فقررت الطلاق بعد 6شهور، وبقولهم دلوقتى نفعتونى فى أيه ؟!.

فيما تحدثت "رباب"، بدعوى النشوز المقامه ضدها من زوجها، "أهلى دائما يقوللى يا بنتى الرفض الكتير هيوديكى فى داهيه، وسنك هيتقدم ومش هتلاقى عريس ويتكلموا ببشاعة عن العنوسة، فاتسرعت ووافقت ويارتنى ما عملت كدا، وأصلى بطختى طلعت قرعه وكلتها غصب عنى لغايه ما فاض بيا من المر، وقررت أنه كفايه ولكن جوزى رفض يطلقنى بعد سنة جواز أقام ضدى دعوى النشوز، بس أنا هخلعه قبل ما الموضوع يكبر ويبقى عندنا ولاد يشوفوا بلاوينا".

وأوضحت "نجوان"، ضحية شبح "العنوسة"، "أنا دكتورة ولكن العادات والتقاليد فى بلدنا صعب التمرد عليها، وبنضيع عمرنا فى حاجات مش بنحبها عشان الخوف من كلام الناس، ودا اللى حصل ليا اقارب والدى كانوا دائما يعيروا والدتى بـ"بنتك خدت ايه من الشهاده اهو سنها كبر"، فقررت أن أريح دماغى وسمعت الكلام ومشيت زى الكتاب ما بيقول لما قالولى "القطر هيفوتك" منهم لله دبثونى فى شخص عرفنى إيه قيمة الدلع اللى كنت عايشة فيه مع أهلى وخلعوا".

بينما قال "خالد"، أمام محكمة الأسرة بمحكمة إمبابة، أثناء نظر دعوى الطلاق التى أقامتها زوجته ضده، "كنت مقرر أعيش متهنى ومرتاح البال، وفعلا نجحت أنى أعيش حر حتى سن 36 ولكن والدتى طبعا مبطلتش تضغط عليا، ورغم أنى مدير فى بنك محترم ولكن أمام أمى بتحول طفل، واختارت ليا العروسة حسب الكتاب ما بيقول، وأنا خضعت ليها بما أنى مش بحب ولما شوفتها أعترضت، قالتلى "أن كل البنات (نافخة جسمها) والحق خد عروسة محترمة على طبيعتها مش ذى بنات دلوقتى، ووافقت، واتضح ليا أننا أرتكبنا جريمه فى حق المجتمع وأهو مشكلتنا بتنتهى على أعتاب محكمة الأسرة".

وتحدثت "كريمة"، "هخلعه من غير كلام كتير، الخلاصه أنهم بيقولوا الملافظ سعد، بس سعد أنتحر لما أتكلم مع جوزى أحنا ناقر ونقير مش بنتفق نهائى، وكله دا بسبب أنى أتجوزت جواز تقليدى وأدينى بدفع الثمن".

فيما قال"مصطفى"، "الروتين والملل بيخلينا ندهور وأنا أرتكبت أسوء خطا فى حياتى لما حسبتها ذى الناس ما عايزه مش زى ما أنا ما عايز، وللاسف فشلت بعد 3شهور جواز وبالرغم من خبرتى، وسنى الكبير 40 سنه، وأتضح أنى غلط غلطت عمرى فعلا، زى العربيه يـا تخبطك وتموت وتدخل الجنه يــا تخبطك وتموت وتدخل النار، انت ونصيبك بقى".

وتحدثت "نورهان "، قائلة "اتدلعت وعملت البدع فى الآخر اكتشفت أنو حمار مبيقدرش، أيوه دى حقيقة عشان كدا هخلعه وأهلى بيحالوا يكرروا نفس الغلطه معايا، وياخدوا القرار أنى أستمر غصب عنى ولكن أنا وقفت فى وشهم،كفابه بقى تحكمات".

وقالت "دانا"، "أهلى نصحونى أختار اللى شبهى، ومن يومها باخد على دماغى مستحملناش بعض، هو عصبى وأنا عصبيه بقيت حياتنا حريقه، ومفيش حد عارف يتغير عشان التانى أصله جواز عقل مش بنحب بعض".

ومن جانبها، قالت الدكتورة مها توفيق أستاذة علم النفس، "نفسيا قرار الارتباط يعد من أصعب الخطوات التى من الممكن أن يتخذها أى إنسان، لذا فكر مرتين، ويوجد 3 أشكال لقرار الزواج، تجعل أى تجربة منهم تبوء بالفشل، الأولى "الزواج خوفا من العنوسة" سواء للرجل المرأة، لأنها تجعلهم يواجهون بعد الزواج الشعور بـ"الندم" بعض أن يكتشفون أن أخطأوا فى حق أنفسهم وياليتهم فضلوا راحتهم عن نظره المجتمع".

وأضافت، "الحالة الثانية الزواج بحثا عن الأمان والاستقرار وهنا نجد أن غالبية الحالات تكون من النساء، وإذا وجد الرجال ضمن الشريحة فإنهم أكثر حفاظا على الزواج من زواجاتهم بسبب ميول الرجال إلى التفكير عن طريق العقل والحسابات أكثر من النساء التى يفضلن التفكير بقلوبهم".

وتابعت، "الحالة الثالثة الزواج بحثا عن الجنس والعلاقات وهو (أفشل) أنواع الزواج، والسبب يرجع إلى أن الحالة النفسية والهرمونية لأى جسم بعد التعود على (الجنس) لا تجد اشتهاء له بنفس القدر التى كانت عليه فى البدايات ومن هنا يجد الزوجان السبب الرئيسى للزواج (انتهى)، وبالتالى يصبح الزواج أسرع من أى نوع آخر فى الانهيار".


أخبار متعلقة:

طبيب نفسى: إفشاء أسرار الحياة الزوجية وراء الانفصال