"طلع البدر علينا فامتثلنا واهتدينا" قصيدة لـ"سعيد شحاتة"

يا صاحبى يا واقف على باب النبى
بلّغ سلامى وقول له زاد الشوق
قول له إنى قاعد فى المقام الزينبى
عاشق بيغسل روحه بالمعشوق

"طلع البدر علينا" وابتدى وقت الصمود
سلّم القرآن وسلّم ع المداين والحدود
"طلع البدر علينا" وساب عدالة ربّه فينا
"طلع البدر علينا" فامتثلنا واهتدينا
"طلع البدر علينا" خلّى نور الحق أجمد
جدّه قال للناس محمد، بس فوق العرش أحمد
"طلع البدر علينا" ومرّ فوق الأرض سالم
قال شفيع للأمّة لكن بعد ما تردّوا المظالم
"طلع البدر علينا" وشال وحط وعاش وطهّر
"طلع البدر علينا" وكل شىء فى الأرض زهّر


صلّيت عليك فى كلّ وقتْ وحين
وسلكت لك بَدَل الطريق طريقين
يا مخلّص الأوجاع من الأبدان
عشمان وعَمران بالإيمان والدّين


كان نفسى أكون واحد من أصحابك.. من المريدين.. من العشاق..
من الواقفين على بابك وراسمين ضحكتك ترياق...
من الماسكين بوارق خضرة ومهاجرين إلى يثرب معاك لأجل الوصول للمبتغى، والعودة للجبروت بسيف الحق وبدرع الأمان
من المتحصّنين بالحلم وبنور الإيمان
من الواثقين بكلمة ربّنا وواقفين على الحق المبين ومخلصين الجسم م الأدران
من الرافعين رايات العدل قدام السيوف الخدّامين المرعوبين رغم العبيد والصولجان
كان نفسى أقف ويّاك أمام الكعبة وأنت بتبتسم للطيبين وبترمى آخر فرحه فى قلوبهم وبتوحد وبتقول للأئمه: الله
كان نفسى أشوفك وأنت بتوقّع هبل وبتؤمر الأحجار فيتحطم مَناه


صلّيت عليك فى كلّ لحظة ف عمرى بتعدّى
وقريت ومدّيت بالسلام يدّى
يا أغلى من روحى اللى فى ضلوعى
عشمان وراضى وهادى ومهدّى


كان نفسى أكون فى عنيك رضا..
كان نفسى أكون فى البق ميّة مضمضة،
كان نفسى أسلّم ع الصحابة ف حضرتك وأهتف: نبى عربى اتّحد ويّا الغلابة وحقق المضمون وهز عروش عبيد الجاه وصمم ع الهدف، فاتحول الريفى لنبيل، وسجد أمام الرب زى الفيل ما عاند أبرهة وسلّم على البيت وانتظر رمح الشهادة يخلّص الروح من شِباك الفيل
كان نفسى أكون لحظة ميلادك فى السما أبابيل
وقصيدة طاهرة وطلقة من سجّيل
كان نفسى أشوفك بعد صوت جبريل
كان نفسى أقف جنبك فى بدر، وألِم جتة حمزة من ساحة أحد وأحفر معاكم خندق الجنّة


الحنّة فى إيدين الشهيد فايحة
والروح فى عشقك يا نبى رايحة
مفتون وقلبى فى سكّتك سارح
عاشق وعشقك أوّل اللايحة


الوحى نازل م السما للمؤمن الأمّى المناهض للفساد والعنف ولوأد البنات
نازل بحكمة ربنا وماشى بثبات
والغار بيحضن صاحبه وبيقرا الآيات،
والدنيا بترتل وبتدوس ع السكات والظلم والإكراه
وأنت اللى واقف تبتسم فى الكعبه وتقول للأئمة: الله
والوحى نازل بالحياة وياه لكل اللى اتحرم من حقه واتاخد رهينة كدب قبل الكدابين ما يغيّروا وشوشهم ويتداروا ف ملامح مؤمنين
الوحى نازل للخلايق أجمعين بالصدق والخير والمدد والعون
نازل يواجه سطوة القيصر،
ويعرّى كسرى ويلعن الفرعون إذا صمّم وساق فى الفَرْعَنة
صلى الصحابة وراك تلتّاشر سنه وكان نفسنا نصلى ف صفوف الصالحين خلفك
ونقول لأولادنا الرسول سلّم علينا وباسنا وادّانا الأمل وسمح لنا نحلم ببكرة الجاى حياه
لكننا واقفين على آخر حدود الدنيا بنحاول نعيش لحظة ميلادك واحتواء الغار لجبريل الأمين
واقفين بنقرا الفاتحة والإخلاص وبعد صلاتنا بنسلّم عليك ونقول آمين
ونقول لروحنا يا ريت نقولها وراه
ويا ريت نكون يوم القيامه معاه
ونقول جميعًا للأئمه: الله


للقبله وجّهنا الوشوش شطرك
وقرينا كل اللى احتواه سطرك
ومشينا نحلم بالوصال والشوق
ونشمّ فى عروق المكان عطرك


الوحى نازل م السما للغار مُحَمّل بالمدد والنور، يبشّر بالسلام والحور، يعمّر بيتك المعمور، ويفرس بالسَكينه الدور، ويقرا "يس" على الصاحيين، ويقرا "النصر" للمنصور... يعمّر بالآيات البور، ويكسر راس هُبل ويثور، على كل اللى عاش خاين وكاسر فرحة المكسور


إحنا العبيد فى الحضرة أولاد العبيد
وإحنا اللى واقفين فى السما شايلين جريد
وأنت اللى طالع "من ثنيات الوداع"
وإحنا اللى بنفسر لهم معنى النشيد


"طلع البدر علينا" وابتدت رحلة صمود النخل فى بيوت المدينه، وابتدى الطرح فى عناقيد الوِقيد الطيبه الطاهره المتينه، وابتدى العالم يشوف بركات "حليمه" وابتدى الناس يعرفوا "آمنة" الأمينه
كل شيء أصبح مسالم والحياة نامت على صدر "السَكِينة"
أبرهه الأشرم ما تمّش عامه واتحوّل عجينه، والقلوب اتحولت لقلاع حصينة
بس أنا كان نفسى أقف خلفك وأحارب، وأحكى لولادى إن أنا ف حضرة نبينا


"طلع البدر علينا" وابتدى وقت الصمود
سلّم القرآن وسلّم ع المداين والحدود
"طلع البدر علينا" وساب عدالة ربّه فينا
"طلع البدر علينا" فامتثلنا واهتدينا
"طلع البدر علينا" خلّى نور الحق أجمد
جدّه قال للناس محمد، بس فوق العرش أحمد
"طلع البدر علينا" ومرّ فوق الأرض سالم
قال شفيع للأمّة لكن بعد ما تردّوا المظالم
"طلع البدر علينا" وشال وحط وعاش وطهّر
"طلع البدر علينا" وكل شيء فى الأرض زهّر

يا صاحبى يا واقف على باب النبى
بلّغ سلامى ووصّل الأشواق
قول له إنى قاعد فى المقام الزينبي
قول له إنى مشتاق والبعاد حرّاق