"يعنى أبقى قُرنى!".."ده أنا أطلقها أحسن".."أنا كده يبقى ماليش لازمة".."مفيش حاجة اسمها كده".."لازم رأيى هو اللى يمشى".. أبرز ردود الرجالة على فتوى "الجندى" بعدم أحقية الرجل فى التحكم بملابس زوجته

فتوى مثيرة للجدل هذه التى أطلقها خالد الجندى، وأكدها كثير من علماء الدين، والتى أكد خلالها أنه ليس من حق الرجل أن يتدخل فى اختيار ملابس زوجته، وعلى الرغم من أن هناك الكثير من التفاصيل التى تضمنتها الفتوى أو حديث علماء الدين، حيث أوضحوا أن يشرط عليها الحشمة فقط، ولكن ما دون ذلك فهو من حقها، وأنه لا يوجد أى شىء يجعل الرجل يفرض رأيه على ملابس زوجته، أو يعكس ذوقه عليها، هذا التصريح كان بمثابة شرارة ألهبت عقول الرجال، وأثارت عصبيتهم، حيث وجدوا أنه تعد واضح على حقوق الزوج، وأن الرجل من حقه أن يأمر زوجته بأن ترتدى الملابس التى يجدها مناسبة، هذا هو مُلخص لمجموعة من الآراء التى جمعناها من خلال ردود أزواج قرروا التعليق والثأر لرجولتهم من مثل هذه الفتاوى.

يقول "شريف سالم" متزوج ولديه ابن:"يعنى إيه تلبس اللى هى عايزاه، أومال أنا أروح فين، أقشر بصل، مفيش حاجة اسمها كده، أنا الراجل والمفروض هى تسمع كلامى أنا اللى هتحاسب عنها، ولازم أطلب منها تلبس لبس معين عشان تكون محتشمة، ومحدش يبص ليها، ده شرفى، ومعنى إنى أوافق أنها تلبس على مزاجها يبقى خلاص أنا لمؤاخذة "قرنى".

أما أحمد الصباغ يقول عن هذه الفتوى:"دى فتنة بتسخن الستات على أزواجهم وده ميصحش، لأن القرآن بيأمر الستات إنهم يسمعوا كلام أزواجهم، ومفروض عليها الحجاب، ده غير إنه مفيش حاجة اسمها تلبس حجاب، ومن تحت ملابس غير لائقة، عشان كده لازم أكون أنا رقيب عليها، وأشوف بتلبس إيه وبتعمل إيه، لأنه كده يعنى تمشى على حل شعرها، وتعمل اللى هى عايزاه، ولو أنا عملت اللى بيقول عليه الشيخ خالد ده يبقى أنا كده مليش أى لازمة وأطلقها أحسن، لأنى مليش أى دور وهى بقى تلبس اللى هى عايزاه وتتصرف زى ما هى عايزة".

لم يكن رأى محمود الحارونى يختلف كثيراً عن هذا الرأى السابق، حيث أكد أنه واجب على الزوج أن يختار ملابس زوجته، وأضاف:"أنا دورى فى حياة مراتى رقابى، يعنى أعرف بتعمل إيه وبتكلم مين، وكل حاجة عن حياتها، ولبسها فى المقام الأول، لازم أقول رأيى فى لبسها، وأحدد شكل اللى تلبسه لأنها شرفى، وأنا اللى لازم أقول تلبس إيه ومتلبسش إيه، أومال أنا متجوزها ليه عشان تمشى كلامها عليا، أنا معنديش كده كلامى أنا اللى بيمشى".

أما عادل الحديدى فأكد:"الزوج لازم يقول رأيه فى لبس مراته، ويختار كل حاجة فى حياتها، عشان ده بأمر الدين، ومفيش هزار فى الحكاية دى، ولازم أعمل كده مع زوجتى المستقبلية، ولو معملتش كده هكون لمؤاخذة، ومش راجل".