سيد منير عطية يكتب: إيه خطتِك؟

رجعالى ليه ؟
إيه اللى فات منك
وراجعه تكمليه ؟
إيه خطتك ؟
قلبى خلاص ما بقاش يدق
الدق مات من طعنتك
فاكره زمان ؟
كنتى الغريقة ف الهموم
والقلب كان لك طوق نجاة
محدوف على الموج العفى
علشان يحاول ينجدك
وطلعتى ع البر الجديد
وفتحتلك جوّه الوريد
أجمل جناين للدفا
عصافير جناين حبنا
ما كانتش يوم متكتفة
كانت طليقة ف السما
وانتى وانا
فارشين هوانا ونبتسم
كان الرغيف لو يتقسم
تلتين عشانك تشبعى
والتلت كنت باخزّنُه
علشان تجوعى ف تلاقيه
وانا قلبى يشبع ..
من مرور الشوق عليه
شوفتى المحبّه قد إيه؟
أو قصدى كانت قد إيه ؟
دلوقتى قلبى صار جريح
ومافيش جريح يتحمّلك
راجعالى ليه ؟
إيه خطتك ؟
لو كنتى ناسيه غلطتك
ف انا لسّه فاكر كل شىء
غدرك
خيانتك
طعنتك
فاكر كمان قلبى البرىء
اللى انكسر من ضربتك
فاكر طريقتك ف الكلام
فاكر كمان ..
زيف دمعتك
فاكر وانا ف عز الدفا
إزاى حدفتينى بجليد
وزرعتى برد ف سكّتى
مع إنى بالقلب الكبير
زارع ورودى ف سكّتك
راجعالى ليه ؟
إيه خطتك ؟
دا ان كنتى زاد
ح انوى الصيام
وان كنتى ميّه ح اموت عطش
وان كنتى داء ح استأصلك
أنا كنت عاشقك من زمان
دلوقتى قلبى بيكرهك
ف ان كنتى جيّه بالحياة
ح اتدارى وسط الميتين
واكتب على باب الضريح
ميّت ..
وقلبه بيرفضك