بعد بائع الفريسكا الشهير.. بطل جديد ينضم لـ"السوشيال ميديا".. "نور" رسام متجول فى الشوارع.. يرسم البسمة على وجوه المواطنين.. حلمه النجاح فى الفن وأسلحته فرشة وألوان

"شعر منكوش، ملابس مرسومة باليد، عدة ألوان" للوهلة الأولى تظن أنه شخص مجنون فاقد للعقل، ولكن بمجرد الاقتراب منه تلاحظ شاب بسيط يحمل علبة ألوان يسير بها لرسم الضحكة على وجوه المواطنين فى الشارع.

"حسين رمضان" هو الشاب الذى امتهن رسم الوجوه فى الشوارع، ليتحول لبطل جديد ينضم إلى نجوم السوشيال ميديا، بعد يوسف الشهير ببائع الفريسكا، وتتحول قصته إلى مصدر إلهام للعديد من الشباب، فى "بوست" يحمل قصة شاب يتحدى الظروف ويرسم السعادة فى الشوارع مقابل خمس جنيهات.



"اليوم السابع" تواصل مع "حسين" الشهير بـ"نور" شاب بسيط من حلوان مواليد 91، وهو خريج قسم الديكور بالمدرسة المعمارية فى دار السلام 2011، طموح ولديه مستقبل رسمه حتى لو فى خياله، وبعد الفشل فى الحصول على مهنة فى عالم الفن الذى يعشقه حجز مساحة خاصة لنفسه يحيطها بالبهجة والألوان فى العديد من شوارع مصر.

ويقول "رمضان": أنا بعشق الرسم والزخرفة والألوان والديكورات المرتبطة بطبيعة دراستى، وبعد التخرج اشتغلت فى كل حاجة من بائع فى محلات الملابس، للمطاعم وحتى الكوافيرات، ولكن كان لدى أمل أن أعمل فى شىء قريب من دراستى حتى قررت أعمل فى شىء أحبه وهو الرسم".



وتابع: صممت ملابس مخصصة لجذب الجماهير وتكوين شخصية خاصة بى، ونزلت ألف فى الشوارع، وأرسم بالألوان للبنات والأطفال، بعمل حاجة مقتنع بها وبحبها" مشيرًا إلى أنه ليس لديه مكان محدد يقف فيه.

واختتم "نور" كما يحب أن يطلق عليه، قائلا "أنا نفسى فى شغل حتى لو بسيط عشان تعبت من الشارع وبهدلته".

الجدير بالذكر أن شهرة "نور" على مواقع التواصل الاجتماعى، بدأت من "بوست" لإحدى المدونات على موقع التواصل الاجتماعى "فيس بوك" وجاء فيه " النهاردة أنا وصحابى كنا ماشيين فى شارع 9 فى المعادى، لاقينا واحد لبسه غريب كله ألوان ومنعكش شعره ومعاه عدة ألوان وبيرسم للبنات والأطفال بالحنة على إيديهم الصراحة الفضول أخدنا عشان نتفرج، يدوب لسه بنقرب عليه لقيناه ما إداناش الفرصة وبيرسم على إيدينا".



وأضافت "وهو بيرسم قالنا أنا أصلا خريج فنون جميلة قسم ديكور دفعة 2011 بس مش لاقى شغل لحد دلوقتى فبنزل هنا كل يوم برسم بالحنة وبألوان الجواش".
وأردفت الولد ده اسمه "نور" وبيكون موجود فى شارع 9 كل يوم وبياخد 5 جنيهات للرسمة وممكن الرسمتين كمان هو إدانا نمرته عشان لو حد عايز Planner لعيد ميلاد أو خطوبة أو أى مناسبة 01120669831.

وبعد نشر البوست أمس الخميس تم تداوله بشكل كبير، وتوالت التعليقات على "البوست" فقال أحد المدونين "فكرته حلوة بس شكله غريب ده كده هيخوف الناس منه"، وطالب آخر من الحكومة بتوفير فرص عمل للشباب بدل البهدلة فى الشوارع من أجل لقمة العيش.