"أنا المليونير" قصيدة لسعيد شحاتة

فى كل المحافل معلّم وبيه
ومجدع ومَبْدَع وعتره ونبيه
وحافظ فى كل الأماكن مقامى
مهندم ومبسوط بطولى وقوامى
وأحب المداهن وأموت فى الحرامى
وأشجّع آراء العبيط والسفيه
ولو حدّ عايز يصوّر "ملاحمى"..
أنا لونى فحمى.. وهذا "السى فيه"

حرامى وقمرتى وعديم الضمير
وعارف طريق الجوامع وسامع
وطمعان تملّى ف حاجات الفقير
أصلى الضحى فى الطريق العمومى
وأصلّى العشا قبل ما أخلع هدومى
وأصلّى واسلّم فى حضرة خصومى
وأحارب عشان يرضى عنّى الكبير

مسالم وسالم وفاهم وعالم
وفى القاعه قاعد بأردّ المظالم
وشاعر إذا الأمر يلزم وحالم
وطالع أسانسير ونازل سلالم
وشغالها بالجهد شغل العوالم
محارب وهارب وسيف قلبى تالم
ومجهول وغامض ومطلى المعالم
ودايمًا مؤهل لرتبة وزير

مَصالح.. أوالح.. رواسب.. فوالح
محمص.. ملمّص.. معمّص.. ومالح
....... وصالح وملهم وفاسد وطالح
......... وقايم بدور الملاك المُصالِح
إذا استدرجونى بحرامى الحمير

أنشن أصيب الهدف غصب عنّه
وأبيع أى كائن وأجيب حقى منّه
وأراهن على الخلق طفله ومسِنّه
وأشوّح بسيفى ف عيون اللى سَنّه
كأنّه وكأنّى وكأنّى وكأنّه
.............. لأنّه ولأنّى ولأنّى ولأنّه
لكنّه ولكنّى ولكنّى ولكنّه
...... حرنكش وبيره وعصاير شعير

دماغى المعمّر
دراعى المشمّر
رغيفى المقمّر
وديكى المحمّر
نبيتى المخمّر
فسيخى المكَمّر
أكسّر إذا استدعى ذلك وادمّر
وأدافع عن السرقة وأرقص وازمّر
وتحيا المسائل فى وسط السرير

مراتى ف حضانتى
ولادى ف حصانتى
فلوسى ف خزانتى
وأرضى ف ميزانتى
ولا عمرى أفرط وأغامر بسنتي
ويحلف جميعهم براسى ورصانتى
ويشهد بفضلى الكسيح والضرير

معلّم فى سوق السمك بالعباية
ووسط الغنم عربجى بالعصايا
ولو تحكم القافيه بألبس ملايه
وأسوق ع البهايم تناحتى وغبايا
وممكن أكون للطحين الرحايا
وأكون كوز عسل فوق نهود الصبايا
وممكن أكون كيس دقيق للفطير
وقعدة معسّل وفرشة حصير

فراخ للكروش
ورق للسجاير وراس للشاكوش
وعبد المعين لو أعان يبقى خاين
وعبد السلام لو سِلِم ما أعرفوش
وراحوا اللى راحوا
............. وجم أو ما جاوش
أنا كل اللى يلزمنى لمّ القروش
وقتل الهاموش واحترام المصير
وأكمّل مسيرتى
وأعاير بسيرتى
وأكمّل صلايا
وأتمّم دعايا
وأقول ربّنا بس يحفظ بصيرتى
حرامى وقمرتى وعديم الضمير
وعارف طريق الجوامع وسامع
وطمعان تملّى ف حاجات الفقير
لكن مرضى عنّى
كأنّه وكأنّي
لكنّه ولكنّي
لأنّه ولأنّى
...........
................
................ أكيد مليونير
*********