مشادة بين عضو بفرقة "كايروكى" وأحد الجماهير بسبب سعر تذكرة الحفل

شغل رد المطرب أمير عيد، أحد أعضاء فرقة كايروكى، على أحد جمهور الفريق، الذى انتقد أن يكون سعر التذكرة الخاصة بأحد حفلات الفريق 150 جنيها، العديد من مستخدمى مواقع التواصل الاجتماعى الشهيرة "تويتر" و"فيس بوك".

البداية جاءت عندما انتقد أحد جمهور فريق "كايروكى" بلوغ ثمن تذكرة إحدى الحفلات التى أقامها الفريق الغنائى الشهير 150 جنيها، حيث كتب على تويتر مشيراً إلى أمير عيد بقوله: "ناس بتموت وناس بترقص، دلوقتى بقيت من الناس اللى بترقص عامل حفلة بـ150 جنيها، زيك زى غيرك من المعلنين بيدوروا على فلوس فى جيوبنا".

وجاء رد أمير عيد، الذى أثار حفيظة عدد من مستخدمى المواقع الشهيرة، كالتالى: "دى حفلة استثنائية وتكلفتها ضخمة، وفيها باند ومسرح تانى، زائد إن الرقص مالوش دعوة بسعر التذكرة، لأن أكيد حضرتك لو مجتش الحفلة مش هتموت".

وعلق أمير على ردود الأفعال الغاضبة على تعليقه لأحد الأشخاص من جمهور الفريق قائلاً: "الكلام ده مكتوب فى سياق غير سياقه أنا ردى كان على شخص بعينه ومكانش على جمهور كايروكى، وفى سياق مبنى على أن الشخص ده بيشبه الحفلة بأغنية ناس بترقص وناس بتموت اللى أنا غنيتها على أساس إن أنا برقص وهو بيموت أنا اللى عملته إنى شرحتله وضع الحفلة وقلتله لو حضرتك محضرتش مش هتموت رداً على التشبيه بتاعه وعلى سخريته واتهامه لينا بأننا كل اللى يهمنا الفلوس، الحقيقة أنا كنت متردد أنى أرد على الكلام الفارغ ده بس فى النهاية قررت أرد احتراماً لجمهورنا مش أكتر والحقيقة أنا مش مهتم تماما بأى حد فى القصه دى غير جمهورنا وميهمنيش رأى الظياطين والعيال الفاضية ولا حتى الصحافة".

وتابع قائلاً: "أسعار حفلاتنا زى ما هى من سنة ٢٠١٢ ومتغيرتش باستثناء حفلتين تلاتة فى السنة وبيبقى بمشاركة مع فرق أخرى أو بيكون حدث كبير ومكلف زى ساوندكلاش".

وأضاف: "كفاية مبالغة فى موضوع ارتفاع الأسعار ممكن تدخلوا على صفحة كايروكى وتراجعوا الحفلات اللى عملناهم السنة دى وتشوفوا أسعارهم والسنة اللى فاتت وآخرهم حفلة امبارح فى الساقية وتشوفوا الأسعار وتشوفوا عدد الحفلات المجانية اللى بتتعمل، وممكن تعمل مقارنات وأنا على حد علمى مفيش فنان أو فرقه بتعمل عدد الحفلات المجانية اللى بنعملها".