مدحت مصباح جميل يكتب: بحر المُستحيل

خدتنى سفينة خيالى يوم لبحر المستحيل
وكان البحر عالى والريح كان خطير
فجأة انقلبت سفينتى وهلاكى هو المصير
وفى وسط الموج بعانى والموت ماله بديل
لقيت شىء سَحَبنى وفى الهوا بطير
ونزلنا على جزيرة بعيدة قوى غريبة
بصيت ع اللى جابنى وم البحر شالنى
لقيته قاعد جنبى شكله غريب فزعنى
استعذت منه ربى قال ليه كده يا صاحبى
قلتله أنت إنسى ولا ابن جـــــنـــــــى
قال أدى حكايتى عشان متخفش منى
إبليس هو جدى بيقول يا وِلد وِلدى
النار هى خلقى مش طين زى إنسى
غضب عليا ربى واللــعــن هو ورثى

مش هدخل نار لوحدى اغوا الناس ياجُندى
لكنى أنا ياصاحبى على الفِطرة خلق ربى
قُـلت إيه أنا ذنبى اللـعـن يبقى حظى
فهجرت كل أهلى وجيت هنا لوحدى
استغفرت كل ذنبى وطمعت فى فضل ربى
قُـلت لكن عدوى قالها زمان ربى
" لقد سبق القول منى".. بسرعة قوام قاطعنى
طمعان فى عـفـو ربى لو النار تحت منى
فُـقـت أنا من حِلمى والدمع مالى خدى
مهما كتبر ذنبى مش هنسى عـفـو ربى
لو بس رفعت كفى هيقول لبيك عبدى