صلاح السنديونى يكتب: يا ريتنى ما كنت غنى

يا ريتنى ما كنت غنى ...... ولا عندى فلوس كتير
يا ريتنى كنت عادى ......... والا حتى فقير
ويا ريت ما كنتى عندى......يا ثروة ما تتعدى
ويا ريتنى كنت موظف..........والا حتى غفير
الناس باصينلى بصة.........كلها حقد مع خسة
ويقولوا اشمعنى هو.....عنده فلوس تملا بير
وفى كل مكان أروحه............الكل يقدم روحه
عايز كارت توصية.........والا أكلمله وزير
أما الستات آه منهم...........لما فى مرة أكلمهم
يحكوا لى عن أسرار.......ما يقولوهاش للكوافير
مش عارف أخد راحتى.....ولا مالك ساعة من وقتى
نفسى آكل فول وفلافل.........واشرب ميه من الزير
نفسى أقعد يوم على قهوة.......اشرب شاى واشرب قهوة
واشرب شيشة ومعسل ........... من غير بودى جارد كبير
ما تعدش عندى مزارع.........فدادين ياما ومصانع
اللى بيزرع مكرونة...............واللى بينتج طراطير
شمس فى ازايز اعبى...........ونجيب فى حاجات ونودى
نستورد أو بنصدر............دخان وساعات عصافير
واهو كله تجارة يا بيه...... ومحدش عارف ليه
الناس لاهياها الدنيا...........فى الآخرة مفيش تفكير
مش هاخد حاجة معايا.........وحاسيب كله يا ضنايا
والورثة يقولوا عليا..........كان جلدة وغبى وحقير
ماهى باين دى اخرتها..........لما حيعرفوا اخرتها
وفلوسى تبقى معاهم...........يتمتعوا بيها كتير
يا ريتنى ما كنت غنى........ولا عندى فلوس كتير