محمد عمر يكتب: زَى مَا قُلتلِك

خانِك وباعِك زى بردو ما قُلتِلِك
سابِك لوحدك و ف عينيكى دمعتِك

قالِّك إنك كل حُبهُ
وإنك الكون والوجود
مهما يحصل جوا قلبهُ
حُب مكتوبلُهُ الخلود

قالِّك إنك حاجة تانية
وإنه بيحبِّك بجَّد
عَيِّشِك أحلام ودُنيا
واتفق على ألف وعد

عَدِّت الأيام يألِّف
كل يوم فى كلام جديد
وأما كدبه يبان .. بيحلِف
إن ظنِّك مش أكيد

لمّا فكَّرتيه بحكايتى
قالِّك إنى جرحت .. بِعت
قال على خيانته .. خيانتى
إن أنا خُنت و ظلمت

أسطوانة قالها ليَّا
وقالها بردو لِلى قبلى
هية نفس التمثيلية
و انتى بطلة جديدة بعدى

أصل ده .. أصله و طبعه
كل يوم .. واحدة و حكاية
قلبه فى خيانته مطاوعه
حاجة بتسلِّى و هِواية

كنت صادقة كتير معاكى
يوم ما عنّهُ جيت حَكيتلِك
بس ما سمعتيش كلامى
و افتكرتى دى غِيرة مِنِّك

مش بَلوم أو فيكى بشمَت
بس لازم كنت أقولِّك
و آجى علشان ليكى أثبت
إنى كنت أقصد نصيحتك

إنسى أيامِك معاه
حُطى للأحزان دى حد
بُكره تدِّيكى الحياة
إللى هيحبِّك بجَد

الحياة دى ياما فيها
إللى بيخون و اللى يجرح
بس بردو هنلقى فيها
إللى جنبه أكيد هنفرح .