"ابن حميدو" السمك الصح.. كل اللى نفسك فيه وادفع على قد الإيد

متصدقش الأسطورة اللى بتقول السمك ميتاكلش فى رمضان، لو نفسك فى سمك طازة جايلك من البحر على طول يبقى أكيد لازم تروح على ابن حميدو أشهر محلات السمك فى السيدة زينب، واللى له فرعين فى مدينة نصر ومصر الجديدة، واللى أول ما بتدخله بتعرف على طول سر تسميته بسبب صور إسماعيل ياسين وأحمد رمزى وهند رستم المعلقة على حوائط المحل، واللى بتفكرك بالفيلم الشهير وبالباز أفندى وربطة جرافتته اللى ترد الروح. رحنا نشوف بنفسنا إيه سبب شهرة ابن حميدو وسمعته الطيبة فى منطقة السيدة زينب، على الرغم من وجود محلات أقدم منه، وعجبنا عرض الأسماك اللى فى الدور الأول، طلعنا الدور الثانى المليان ترابيزات كبيرة وجربنا أشهر حاجة للمحل وهى الشبكة اللى بتعتبر خليط من جميع أنواع الأسماك والسى فوود الشهى اللى بيقرمش والمطبوخ على نار هادية خليته أطعم وأجمد، والجمبرى اللى من جماله تحس إنك قاعد فى إسكندرية على البحر بتستمتع بطعم الأكل والهوا بيطبطب عليك وبيخفف من حرارة السمك، ويخليك تشعر بالسعادة وأنت بتاكل، وقولنا نشوف طاجن السبيط بالصوص الأبيض المعمول بطريقة مختلفة ومحطوط عليه توابل مخصوصة بتدى نكهة مميزة للأكل بتميز المحل وتخليه مختلف عن محلات السمك التانية. ابن حميدو عنده جميع أنواع الأسماك الطازة زى البلطى والبورى والبياض والمكرونة وقشر البياض والدنيس والقاروص والباربونى والثعابين والموسى، اللى بتشوفها قدامك نية وبتتوزن عشان تستويلك مخصوص، ده غير السبيط والجمبرى والكابوريا السوبر، اللى بتتقدملك باختيارات كتيرة زى إنك تاكلها مقلية أو مشوية بالزبدة أو صينية بالبطاطس أو بالردة، ومش كده وبس ده عنده تشكيلة من أحلى الطواجن اللى ممكن تدوقها فى حياتك واللى هتغير فكرتك خالص عن السمك زى طاجن الجمبرى بالفريك وطاجن الفيليه اللى بتختاره الصوص بتاعه سواء أبيض أو أحمر.


سعر الأسماك بيختلف حسب سعر اليوم، لكن الطواجن بتبدأ أسعارها من 45 لما فوق، والشبكة سعرها حوالى 75 جنيها، ودى تعتبر أسعار متوسطة مقارنة بأسعار محلات السمك الشهيرة.


لو عايز تروح ياريت متتأخرش وروح بدرى عشان تلحق السمك الطازة والمتنقى على الفرازة وتستمتع بالطعم الأصيل، ولو ناوى تروح فرع السيدة زينب مش هتعجبك القعدة أوى لكن هتستمتع بالأكل وهتتمزج بطعم السمك، ولو قررت تروح فى رمضان يبقى لازم تحجز الأول قبلها بيوم عشان تضمن إنك تستمتع بالأكل بعيد عن زحمة رمضان والطوابير اللى بتقف قدام المحلات مستنية دورها فى الفطار.