أشرف خلف الله يكتب: الدنيا.. ملاهى

ناس بتمرجح المراجيح
وناس بتتمرجح فيها
وناس فيها..
عيوب الدنيا والآخرة
لكن ناجحة..
تلفلف عجلة الشقيان
على الكحيان..
فاتجمع حاصل الشركة
اللى وسطيهم مع التركة
تساوى رغيف..
عشان تضحك كمان ضحكة
هيبعولك الامل.. فـ رغيف

الشعب.. كفيف
وبيسابق فـ اكل العيش
عشان أرخص على التموين
وبينفذ بدون تعريف
ويقدر يحفظ القوانين
عبيط جدا وبيصدق
الجهل.. حياة ومبدأ
وهيحصّل جميع منتجات الصين

العلم.. سور
مبنى على شوية سطور
بدون نهاية مطلقة
العلم فـ بلدك هرطقه
وكتير بيبات
فوق الرصيف
وسعات فـ رف المكتبة
نفس الرصيف هيشيلنى لو
اختلت العيشة الكريمة
ورفضنى حُضن المرتبة
من غير ما يزهق أو يصاب
منى بإحساس الشجن !
انا والرصيف.. اتنين صحاب
الرصيف وظيفة تحتوى
كل أشلاء الوطن...