دعاء عبد الله تكتب: إنسان

قالك سيدى اليأس خيانة
والكلمة دى سلاح وأمانة
والمولى بعيونه حمانا
طب مين اغتال النور جوانا
مين ضيع فرحنا وشقانا
وغرس كل الخوف فى سمانا
قالك سيدى يا واد إخشن
واجمد كدة راح فين الدم
لازم كل الناس تهتم
محدش وحده يشيل لها هم
طيب سيدك أوى يا زميلى
أشطر منى ومن تمثيلى
مش ده برضو كان الأول
زيى وزيك همه مطول
فجأة فى ليله ويوم اتحول
مهى لو كانت كلمة سيدك
بتحل وتربط تعاقيدك
كان حالك غير تلاكيك
وتفوق بقى من الأوهام
زمن السرعة ملهش أمان
زى الحب فى الأفلام
حاول.. ثم حاول.. ثم حاول تفهم إنك "إنسان"
عيب يمشى ع الأرض جبان
ولا يهزه فى يوم حرمان
امشى بقوة دوس ع الأرض
دبت خطاويك تطرح ورد
لعيونك تفرح ألوانه
يتمايل لما انت تميل
ويقولك يا سلام يا جميل
إزاى كنت عايشها بهم
وأنت بيجرى فى دمك دم
تانى وتالت وتريليون
مش هيبطل شوق وجنون
لما تميل وأنت بتتعايق.. إنك إنسان
فيك الألم فيك الحنان
فيك النفور فيك الاستحسان
فيك الرضا وكل الأحزان
عجيب يا صاحبى كفاية كلام
عرفت امتى هعيش فى سلام
وبرضه سيدى قالها زمان
أنا قلبى يابه برج حمام