رضوى عبد الراضى تكتب: يا عينى عليكى يا تيتا!

كتير منا بيفتكر إن الإدمان محصور فى "المخدرات" و أن المخدرات هى أخطر حاجة ممكن يدمنها الانسان وتقريباً الحاجة الوحيدة.. بس مش واخدين بالهم من مظاهر الإدمان التانية إلى ممكن تخلى حياة الإنسان صعبة ومملة جداً.

إدمان الـ social media أو "وسائل التواصل الاجتماعى".. ده بقى جوه كل واحد مننا.. مينفعش يمشى يوم من غير "Facebook,Twitter,Whatsapp,instagram” بس كل واحد بنسبة والنسبة دى يا تزيد يا تقل وصعب أوى أنها تقل.. كل حاجة فى حياتنا محصورة جوه صورة

"selfie" .. كل لحظة حلوة بنعيشها جوة "check in" مالوش أى لازمة.. نخرج مع حد بنحبه نفضل بصين فى شاشات موبيلاتنا لحد ما تفضى البطاريات نروح بيوتنا، إلا إذا حاجة كسرت حاجز الصمت زى حد ضحك مثلاً يبدأ السؤال المُلح من كل الى قاعدين "إيه هاه؟ بتضحك على إيه هاه ؟؟ ورينا؟!!"..

كل المهم ناخد كام "like" على page غادة عبد الرازق لڤرز وكام واحد عامل "retweet" لآخر تويت عندي!! إن الشيطان ميمنعنيش من share اسم الله المكتوب بشعر قطة ، عالم افتراضى ملوش علاقة بالواقع ممكن تكلم بنت اسمها "ana aslun banuta moshkila" و هى مش بنوتة هى حمادة ابن طنط فوزية واللى عايش حياه مش حياته والى فاكر إنه لو بعت الدعاء ده ل ٢٦ شخصا هيوصله خبر حلو كمان ٣ دقائق و لو مبعتش هيموت مشلول كمان ٣ دقائق برضه و اضغط على الرابط لترى فستان هيفاء و هو بيتزحلق و سيلفى kim k الملهلبة و هى حامل و بترفع حاجبها اليمين كداهو..يا عم انا مالى ما تولع!!

كنت بسمع الكبار بيقولوا من كام سنة أن الموبيلات قللت من صلة الرحم و ايامها كان الnokia 3310 و ال sony ericsson و الmotorola ابو باب... يااااه سلام... دلوقتى بقى الموبيلات مقللتش من صلة الرحم بس .. لأ ابسلوتلى ... دى قللت النوم و الاكل و الزيارات و الحياه الحلوة بجد..ده احنا بنروح لتيته نمسك فى موبيلاتنا و إديها chatting و تيتا تقعد لوحدها...يا عينى عليكى يا تيتا!