د. دينا أنور تكتب: طلعها من دماغك ترتاح !

لما بقعد مع أى بنت أو ست متجوزة أو منفصلة أو حتى أرملة بلاقى أن مشاكل حياتها بتنبع من حاجة واحدة بس، تحكمات الراجل اللى فى حياتها.

بنوتة مثلا خايفة تخرج فى مكان معين عشان عارفة أن أخوها بيروح المكان ده وممكن حد من أصحابه يشوفها ويقول له!!!

بنوتة تانية نفسها تسافر مع صاحباتها أو تخرج معاهم أو حتى تقعد معاهم فى البيت فتقعد تخترع أى كدبة تقولها لباباها عشان لو قالتله الحقيقة مش هيوافق!!!

بنوته كمان نفسها تسيب شعرها وهيا خارجة بس لو عملت كده هيسألوها رايحه فين بالضبط؟؟ عشان كده بتضطر تلمه وقبل مابتخرج من باب العمارة بتكون سايباه!!!

بنت تانية لبسوها الحجاب غصب عنها عشان تبان محترمة ومؤدبة،بس البنت ماخدتش القرار بإرادتها،فبما أن كل المفروض مرفوض بتلاقى نفسها بتخلعه فى اقرب فرصة،وبعدين ترجع البيت وهياحاطاه تانى على راسها عشان تريحهم!!!!

تعالوا بقا نشوف كوميديا الست المتجوزة:
الله الفستان ده يجنن،خلاص اشتريه، لا مقدرش أصل جوزى مش هيوافق!!
يابختكم مسافرين، كان نفسى أجى معاكم أغير جو، طيب يلا تعالى، لا أصل جوزى استحالة يوافق أسافر لوحدى!!

تعالى نخرج بالليل شوية،طيب استنى لما انضف البيت واعمل الاكل واغسل الهدوم واحمى العيال عشان جوزى مايلاقيش حجة ويقوللى مفيش خروج!!!!

عاوزة أخلع الحجاب بس جوزى مش موافق، عاوزة اشتغل بس جوزى مش راضى، عاوزة أزور أهلى بس جوزى مابيحبهمش، مابتكلميش فلانه ليه اصل جوزى حلف عليا بالطلاق ما اكلمهاش!

ليه كل ده ! هوا مين قالكم أن البنات بتتولد ومعاها صك العبودية اللى لازم يمضى عليه أحد الذكور اللى فى حياتها!

حتى الست المطلقة أو الأرملة تلاقى والدها أو أخوها أو عمها أو خالها يستلم دفة التحكم فيها بدون ماتطلب منه ده لأنها خلاص بقت من غير راجل!

ربنا لما خلق الست يا حضرات خلقها إنسان كامل بعقل ووعى وتفكير مكتملين، لو كان عاوزها ماتفكرش كان خلقها بدون عقل، لو كان عاوزها ما تختارش كان خلقها بدون إرادة، لو كان عاوزها ماتحلمش كان خلقها بدون خيال.

إنت مين بقا عشان تقنع نفسك إنها لازم تاخد كل قراراتها من خلالك،مين إداك الحق تتحكم فى لبسها وخروجها وسفرها وعلاقاتها ؟؟؟ اوع تقوللى الدين اللى قال كده وأنا هتحاسب عليها لو أخطأت لأن الآية صريحة فى القرآن وبتقول(ولا تزر وازرة وزر أخرى)، اوع تلصق هذه التهم بالعقيدة، لأنك لو كنت فعلا هتتحاسب عليها ماكانش ربنا وجه لها الكلام زيها زيك فى كل ما يخص أمور الدنيا والآخرة وأساليب الثواب والعقاب.

الخلاصة أن تحكمك الزائد والمبالغ فيه بيخليها تبقى مكبوتة وزهقانة وقلقانة دايما من رد فعلك، فبالتالى مع الوقت بتضطر تكدب عليك وتخبى عليك حاجات كتير مش لأنها بتعمل حاجة غلط، لكن لأنها عارفة إنك لا يمكن هتوافق، وبالتالى ده بينعكس لا إراديا على مزاجها العام فتلاقيها بقت كثيرة الشكوى عديمة الإبتسامة وشايلة الهم ليل نهار، فتبتدى تزعق وتتخانق وتتعصب، وحضرتك طبعا عمرك ما بتفكر فى السبب، فورا بتتهمها إنها نكدية وكشرية، وممكن جدا تروح تخونها مع واحدة تانية فرفوشة ومبهجة مع أن أنت اللى كنت سبب كبتها وحزنها!!!

سيبوا البنات والستات يتحرروا، ربنا خلقهم أحرار، ربنا ما طلبش منكم تتحكموا فيهم،والقاعدة الأساسية فى الدين (لا إكراه فى الدين)،اوعى حد يضحك عليك ويفهمك أن إكراهك ليها على شيئ ده بيخليك راجل،بالعكس!!!! الراجل الصح هوا اللى يحترم عقل الست واختياراتها وحقها فى تقرير تفاصيلها،مش اللى بيمارس عقده عليهاوبيفرض عليها كل شىء.

وأنتوا يابنات أن الأوان تتخلصوا من الخوف، تخلصوا من وهم الراجل المسئول عنكم،لازم تعرفوا تقرروا وتحددوا مسار حياتكم،لازم تقفى فى وش أى حد عاوز يسيطر عليكى ويحددلك نمط محدد سواء فى لبس او شكل او مضمون.

لازم تعرفى أنه لا يخاف من حرية المرأة وقوتها إلا الرجل الضعيف لأنه بيحس بالدونية جنبها، لكن الرجل القوى هوا اللى بيطلب منك تكونى قوية لانه بيستمتع بقوتك وبيضيفها لقوته.
أرجوك طلعها من دماغك عشان تعرف تفرح، عشان تعرف تضحك، عشان تعرف تقرر، عشان تقدر تحلم، طلعها من دماغك عشان ترتاح!