البخل والجبن والكذب.. عيوب أوعى تقبليها فى زوج المستقبل "اهربى"

"بكرة يتغير"، "جوزك على ما تعوديه"، "الجواز بيغير"، وغيرها من النصائح التى يقتنع أصحابها بمبدأ "أكفى على الخبر ماجور" والتى تكون سببًا فى خراب بيوت وتشريد أطفال، هذه المشاكل التى يراها من حولك بسيطة هى جرس ينذرك بأن هذه العلاقة لن تستمر طويلاً، وإذا حدث ستكون العواقب ليست فى صالحك، من المؤكد أن الأشخاص تتغير بمرور الزمن، ولكن هناك الكثير من العيوب التى لن تقدر أى امرأة على تقبلها أو تغيرها مهما مرت من سنين، الكذب والجبن أبرزها، عيوب كانت كافية لأن تدمر علاقة زوجة بزوجه، ولكنهم اكتفوا بمنطق "هعمل إيه يعنى" ووجهوا شكواهم إلى "منتديات الفضفضة" باحثين بين المستخدمات وصاحبات الخبرة عن الحل السحرى الذى سيخلصها من هذا الكابوس.

قصص معاناة لسيدات جمعناها من صفحات الفضفضة على الإنترنت، والتى عكست أن هذه العيوب من الصعب التعايش معها مهما حدث...

"جوزى بخيل"

قصة حقيقية قررت صاحبتها أن تفضفض بتفاصيلها لمنتديات الستات، عسى أن تجد بينهن حلاً لأزمتها، هكذا وصفت السيدة البالغة من العُمر 30 عامًا قصتها، بدأت حديثها قائلة: "أنا جوزى بخيل بدرجة مشفتهاش فى حياتى، الجنيه بيحاسبنى عليه، ده غير الأكل اللى بيحاسبنا عليه أنا وعياله الأربعة، معرفش أعمل أيه وأهلى مفيش عندهم أى حل غير أنى أتحمل، بس أنا مش قادرة خلاص، أنا عايزة اتطلق واشتغل أنا وأصرف على عيالى اللى بعتبرهم أيتام، لأن مفيش أب بيحاسب ابنه أكل قد ايه أو صرف 3 جنيه فى إيه، أنا تعبت ياريت ألاقى حل"، هكذا نهت قصتها على أمل أن تجد حلاً، هذا العيب الذى يراه البعض من السهل التعايش معه أو تغييره فيما بعد سيكون سبباً فى خراب بيت عائلة".

جوزى كداب

"كل الناس بتكدب"، هكذا يتعامل الأهل أو الأصدقاء مع شكاوى ممثلة لزوجة تؤكد أن "جوزها بيكدب"، هذا العيب الذى يراه الكثيرين بسيط، هو فى حقيقة الأمر كارثة، ومع الوقت لن تستطع أن تتحمله مهما كانت الأسباب، وهو ما دفع "أم كنزي" البالغة من العمر 35 عاماً أن تحكى قصتها قائلة :"جوزى مدمن كدب، بقى بيكدب على الفاضى والمليان، بسبب ومن غير، وفى حاجات بسيطة وتافهة، ده غير طبعا أنه كداب محترف فى أنه يدارى عليه أى حاجة بيعملها، النتيجة إنى تعبت من دايرة الكدب اللى أنا عايشة فيها، واللى بيقولولى استحملي، ميقدروش يقعدوه معاه كام يوم بكدبه المتواصل ده، أنا مش لاقية حل، واتبعت معاه كل الأساليب الممكنة وغير الممكنة، نفسى ألاقى حل للمشكلة ديه عشان أنا تعبت ومش عايزة أولادى يتعلموا منه العادة ديه، أو أطلق بقى وأخلص مهو مش الممكن الحياة مع واحد بيتنفس كدب".

"جوزى جبان"

لا أحد يتخيل حجم المعاناة التى أشعر بها مع زوج غير قادر على حمايتى، فهو لا يخاف من أى شخص سوى أمه، هى نقطة ضعفه الوحيدة اللى بتخليه قدامها عيل صغير، حقى ضايع معاهم، ولو حد من أهله تجاوز فى حقى أو عملى أى حاجة محدش بيقوله إنت بتعمل إيه، جوزى بيخاف يتكلم مع أى حد منهم، كرامتى راحت ومبقتش قادرة استحمل، وأهلى ملهمش أى دور فى المأساة ديه، ومش عارفة أعمل إيه، ومحدش حاسس باللى أنا فيه".