رضا حب الله يكتب: اصنع حلمك وحققه

لما كنت صغير كان عندى أحلام كتيرة جدا لدرجة أنى كل يوم كنت بعيش تجربة جديدة لشخص جديد بحلم جديد، مره أحلم أكون ضابط شرطة ومرة أحلم أكون طيار ومرة أحلم أكون مهندس ولما كبرت شويه بدأت أحلامى تتقلص وتكون أكثر واقعية فبدأت أحلم أنى أكون مدرس ناجع أو رجل غنى أساعد كل فقير أو حتى عامل فى شركة مستقر فى حياتى واتزوج وأنا صغير عشان اخلف بدرى وما أموتش وولادى صغيرين ولما كبرت شويتين وبدأت فى المرحلة الجامعية اتصدمت فى دنيا غير اللى كنت كل يوم احلم بيها دنيا الواقع والحقيقة.

عرفت أن كل إنسان لابد وأن يعانى ويتعب ويجاهد لكى يعيش كريما فى وطنه الذى اصبحت الفوضى وضياع الأخلاق عنوانا له وأصبح الشخص السوى غريبا وعجيبا ومنكرا.

عرفت أن الإنسان بدون الله عز وجل لا يساوى شئ فبيده سبحانه وتعالى وحدة السعادة والشقاء والغنى والفقر.

وبدأ أكبر حلم بحياتى يراودنى الا وهو أن أحفظ كتاب الله عز وجل كى يحفظنى الله فى حياتى وبفضل الله ومنته على قررت احفظ القرآن الكريم قلت فى نفسى (هى الناس اللى حفظت القرآن دى كلها أفضل منى فى إيه؟ لازم اكون من حفظة القرآن) وبالفعل بدأت فى حفظ القرآن الكريم كنت احفظ كل يوم ما يقرب من صفحتين وعلى مدار عامين اتم الله عليا النعمة واتممت حفظ كتابه العزيز وحينها ادركت يقينا أن أهم وأكبر وأجمل حلم فى حياتى قد تحقق واسأل الله أن يكون القرآن الكريم شفيعا لى يوم القيامة.

ايه معنى الكلام ده يعنى انا ممكن احفظ القرآن كاملا؟ والجواب ايوه ممكن وبسهولة كمان
طيب إزاى؟ الجواب: أنا أقولك إزاى تحفظ كل يوم من بعد صلاة الفجر ما تيسر لك بس مش أقل من صفحة وده اللى أنا عملته.

وبعدين يكون عندك يوم فى الأسبوع للمراجعة وبعدين تتوقف عند كل عشرة أجزاء وتراجعهم كويس ويفضل يكون عند شيخ عشان متكسلش ومتبصش للى فاضل بص للى انجزته وخليك صادق النية وان شاء الله هتحفظ القرآن عشان القرآن ينور حياتك وقبرك وآخرتك إن شاء الله
أهم شىء لازم يكون وقت الحفظ مقدس ولا يقبل الاعذار ولا النقاش وصلى بالله أنت حفظته واحفظ عينيك عن الحرام وربنا هينور عملك بالقرآن.

أوع تظن أن الكلام ده صعب عليك جرب وشوف النتيجة واوع تنسانى لما ربنا يكرمك بحفظ القرآن من الدعاء.