بالفيديو..سهير رمزى لـ"الحياة": "السيسى هدية من ربنا..وحبيت كمال الشناوى وأنا صغيرة"..أجهضت نفسى 3 مرات..تعرضت لمحاولة اغتصاب وقتل فى بداية مشوارى الفنى..ورفضت الظهور عارية تماما فى أفلام لبنانية

سهير رمزى مع راغدة شلهوب

كتب محسن البديوى

الأحد، 10 يناير 2016 05:02 ص

قالت الفنانة سهير رمزى، إنها أجهضت نفسها ثلاث مرات، خشية أن يشارك طفلها حبها لوالدتها، موضحة أن مرض والدتها أوجب عليها الجلوس بجانبها، لذلك تركت التمثيل، مضيفة: منعت نفسى من الحمل، وخفت طفلى يشاركنى فى حبها حتى لو كان ضنايا، وأجهضت نفسى 3 مرات، عشان اللى هيجيى أحبه أوى".

وأضافت سهير رمزى، فى حوارها مع الإعلامية راغدة شلهوب:"لما راحت أمى منى قعدت 13 عامًا بعيدة عن الدنيا كلها والشهرة وكل شىء والحاجة الوحيدة اللى كنت بحبها شغلى عشان كده رجعت للتمثيل، وأجهضت نفسى وبتمنى إن ربنا يسامحنى لأنها جريمة، وحصل انفصال من زوجى، وياريت اللى بيسمعونى ميعملوش إجهاض، أنا عملت كدة عشان حسيت إن أمى مش هتروح منى، ودلوقتى بقيت وحدى".

وروت الفنانة سهير رمزى، محاولة تعرضها للاغتصاب والقتل فى بداية مشوارها الفنى، موضحة أن شخصين حطما زجاج سيارتها وحاولا الاعتداء عليها واغتصابها، وأنهما كانا مأجورين من قبل أشخاص تعلمهم، لافتة إلى أنها لم تواجه الشخص الذى حاول إيذائها.

وأضافت رمزى، أن الشخص الذى حاول الانتقام منها، جاء بسبب رفضها له بعدما تقدم لخطبتها، مؤكدة أن الحادث تسبب فى انقلاب سيارتها، قائلة: "خرجت من العربية مفيش خدش فيا، لأن ربنا حافظنى، ومهما اتحركت مش هعرف آخد حقى زى ربنا ماهياخدهولى، وما فى حاجة بطلبها من ربنا إلا وتستجاب، واللى عمل كده حصلتله كوارث فى وقت سريع".

قالت الفنانة سهير رمزى، إنه عرض عليها الظهور عارية تماماً فى أفلام لبنانية مثلما فعلت الفنانة ناهد يسرى والفنانة ناهد شريف، ولكنها رفضت "لأنها مشاهد عرى فقط وليس بها أى رسالة".

وأضافت رمزى، أن تلك المشاهد كانت عرى فقط، مضيفة: "فى فرق أن الواحدة تلبس مايوة فى البيت، مش على البحر، أو فستان سوارية فى الشارع وليس فى سهرة، ورفضت تلك المشاهد رغم أن مقابلها المادى كان كويس وقتها، والحمد لله لم أكن بحاجة لها".

وتابعت: "أكيد الممثلين اللى عملوا المشاهد دى مكنش يعرفوا ده، لأن فى كادرات المخرج ممكن ياخدها من الزاوية دى أو الناحية دى، مثلاً ممكن تبقى لابسة قميص نوم ولكن زاوية الكاميرا والمخرج ممكن ياخدها بإضاءة تكشف كل حاجة من جوة، وخبرتى الطويلة سبب رفضى لده".

وأشادت الفنانة سهير رمزى، برئيس الجمهورية عبد الفتاح السيسى، مؤكدة أنه "هدية من ربنا" أرسلها لمصر لانتشالها من الأزمات التى كانت تمر بها.

وقالت سهير رمزى، "مافيهوش حاجة مش عجبانى، كل حاجة فى السيسى عجبانى، مقدرش انتقده، والراجل ماشى مظبوط مظبوط مظبوط أوى كمان، وربنا بعتهولنا هدية".

وأضافت سهير، أنها لا تستطيع النوم إلا على صوت التليفزيون، مع إضاءة بعض أنوار الشقة، مؤكدة أنها تخشى الظلام ولا تستطيع التواجد فيه.

وردت سهير رمزى على سؤال الإعلامية راغدة "إذا كنتى نور أى مكان تحبى تضيئيه؟" فقالت سهير: "الجوامع".

وأكدت سهير رمزى أنها أحبت الفنان كمال الشناوى وهى ابنة ست سنوات، قائلة: "كمال الشناوى الفنان الوحيد الذى أحببته ولم أتزوجه، وأحببته وأنا عندى 6 سنين، وكان فتى أحلامى وكان عندى كل حاجة، وهو كان صديق لأمى، وقولت له الكلام ده، ولما كنا بنعمل فيلم المذنبون ويجيى يحضنى أو يبوسنى يقولى يابنتى أنتى ياما شيلتك وعملتيها على رجلى، ومش قادر أحس بيكى".