نصر الدين محمود سالم يكتب: ابن الوطن

غنى يا واد يا ابن الوطن
اعزف على تلج المطر
غنى حالة م الشجن
اضرب واضرب ع الوتر
دندن وقول موال
يوصل لأبعد مدا
يمكن مرة ينفعنا

قوم وقوله ياوطن
قرب مننا خدنا
مين غيرك أنت يا وطن
فى حضنه هيسعنا
غنى واصرخ أوى
يمكن مرة يسمعنا

غنى عرفه بنفسك
اصرخ قوله على اسمك
عارفك ما أنت أحلامه
وعارف حتى لون جسمك
مكسوف تبكى أدامه؟
ولا خايف تشكى أوجاعنا
قام يغنى الواد
قام ولسه هيغنى
سمع الوطن صوته
ضحك الولد سابنى
سمع شكوته ف غناه
قومنا قولنا الله
طلعت معاها الآه
جالنا الكبير سلم
قومنا بروحنا سلمنا
إحساسنا طلع كداب
قال سلام يا ولاد
شاور وفات أحفاد
قفل وراه الباب
راح وودعنا
قعدنا تانى وسكتنا
ودموعنا تحكى تتألم
ياريته ماجانا ولا سلم
مسحنا القهر جوانا
قعدنا سكتنا
مسحنا يأسنا فينا
قولنا ياواد قوم غنى
غنى تانى سمعنا
غنى وقول موال
يلف كل المدن
لو حتى بلا معنى
وغنى يا واد بلا وطن
عشان مقدرش يفهمنا
ولا حس مرة بدموعنا
غنى اكسر هموم الذل
واغزل وطن
كلامنا ليه مفهوم
احلم بيوم يجيى الوطن
لو بالقلم مرسوم
احكى واسعدنا
خفف مرة أوجاعنا