إيمان الخشاب يكتب: ماتموتيش وتسيبينى

ما تموتيش وتسيبينى
استأذنينى.. ودّعينى
ما ترحليش من غير وداع
ما تكونيش زى خاين
رمى كل ذكرى وباع
مين هايمسحلى دموعى
مين هايستحمل غرورى
مين هايستنى رجوعى
أقولك إيه..
مليون دليل
مالكيش بديل
ابعد وبتكونى قَريبة
وأنا كنت باعتبرك غَريبة
كنتى شايلانى كتير
من صغرى عاملانى كبير
عاملالى قيمة وتسوى إيه
لو أنتى مش موجودة جنبى؟
وإن عليت وكبرت
أبقى مش عايزك زى مانتى
كل ما أطلع فوق
تقولى أصحى فوق
اوعى تكون أنانى
ولما اقع واتداس
تحضُنّى أغلى الناس
وتعبّينى بالأمانى
وقال ناوية تسيبينى
إزاى يا روح إزاى يا حيات
وهل ينفع أنسى اللى فات
عمر كامل بيكى عايشُه
والموت من بعدك أنا مش حايشه
هل فى حياة من غير روح
خدنى معاها فين ما تروح
العمر قبلك ما بيتعدّش
والباقى بَعدك ما بيعدّيش
الحب معاكى مابيتذلّش
والوقت بَعدك ما بيجريش
ما تسيبينيش
ماتموتيش وتسيبينى
ولو ناوية من غير معاد
آجى أصالحك
أجرى أصارحك
مش هاطوّل فى البعاد
احجزيلى جنبك مكان
مش هاسمحلك تسيبينى
قبل ما تشاركى على الحِداد