جيهان جمال تكتب : عيشوها بِكُل تفاصيلها

زوج وزوجة

الأحد، 02 أكتوبر 2016 08:00 م

هاتلى ورد يا إبراهيم ..

أنا عايزة ورد يا إبراهيم

والنص كيلو كباب مُش أحسن من الورد يا يُسرية

طبعاً الحوار ده اتربى عليه جيل كامل !

وكمان السوشيال ميديا لها دلوقتى اليد العُليا وبتحاول تكٓمل بطريقتها وده مُجرد مثال لٓفت نٓظرى وحبيت نقف عنده شوية مع حبة تفاصيل ومعانا باردوا.

ورد يُسرية وكباب إبراهيم ...

وهو ده المثال المُوجِع

"" وراء كل ست مكتئبة راجل !

قصف عمرها ونكد على اللى جابوها

حتى تحولت من فرخة بريش لفرخة مخلية مشوية على الفحم""

مُش هاننكِر إن فى أجيال مُختلفة راحت وأجيال أكتر اختلاف جت من بعدها عاشتها شبه السطور اللى فاتت !

ولسه فى أجيال وأجيال هاتيجى وهاتيجى طول مافينا حياة ..

لكن إزاى الأجيال دى تحاول تخلق من حياتها حياة حقيقية بجد ! وحتى لو فشلت يكفيها شٓرف المُحاولة

أصل الحكاية لا يُمكن تكون أبداً

" أهِى عِيشَة وخلاص ""

الحكاية أكيد أعمق وأجمل !

صحيح إن كُل جيل ممكن جداً يختلف عن اللى قبله .. وطبيعى جداً إنه يختلف عن اللى بعده .. لكن مُش عارفة ليه بعض مننا أو يمكن كُلُّنا ممكن نكتشف بعد وقت أننا فِعلاً بنبعد كتير عن الفِكرة الأساسية والطبيعة اللى ربنا أوجدنا وسٓخر كُل الوجود إيلى حوالينا عشان نلتفت ونركز فيها فِكرة "التكامل "

التكامل هو المفروض يكون طبيعة أساس وجودنا .. والتكامل لا يُمكن يكون غير لو عيشنا بجد تفاصيل حياتنا مع بعض .. نِكٓمِل بعض بجد ..

أنت بتحب إيه ؟

وأنا أعمله عشان خاطرك ..

وأنتى بتحبى إيه ؟!

وأنا أعمله عشان خاطرِك ..

فكرة جٓبر الخواطر فى حد ذاتها لو تٓمعنا فيها هانلئيها أساس من أُسس التكامل والسعادة .. لكن بشرط يكون مع الحاجات الحلوة دى حاجات أحلى بمعنى أن تفاصيلنا دى لازم تكون فى حدود إمكانيات ومقدرة كُل طرف فى العلاقة .

وتراعينى قيراط أراعيك قيراطين

وتشوفنى بعين أشوفك باتنين

طب إيه رأيكم فى كلام الزمن الجميل ده بذمتكم لو كُل طرف فى العلاقة طبق بس الكلمتين الحلوين دول بصدق من جوه جوه قلبه ُمش كانت حاجات كتير ها تفِرق فى الحياة ..

مُش معنى كلامى أن الصورة سودا .. لا لِسَّه بينا فى ناس بتعرف تعِيشها صح لكن للأسف قليلين جداً !

وده عِيبه !

لأن لما تلاقى جيل كامل من شبابنا عاش على أمل هو لما حد منهم يتجوز ويعيش مع شريك العُمر ياترى هايكون من حِزْب مين فيهم.

هل حِزْب "إبراهيم" والنص كيلو كباب أحلى من الورد يايُسرية ؟!

والا من حِزْب" يُسرية " وأنا عايزة ورد يا إبراهيم ؟!

أحب أقولكم إن "الهنا" مجموعة تفاصيل والتفاصيل ضرورى جداً يٓكُون فيها الورد يا يُسرية! وكمان ضرورى يكون فيها الكباب يا إبراهيم ..

تعالوا بينا ومن أول السطر

شاركوا بعض كُل حاجة وأى حاجة، حبوا تفاصيل بعض وأرضوا بعض على أد ماتقدروا.. لأنه فى فترة مهمة جداً من العُمر بيتتخطفوا فيها أسرع مما تتخيلوا وهى فترة البدايات بِكُل أعبائها وضغوطها مع ظروف الحياة الصعب إللى حوالينا الفترة دى تحديداً حقيقية جداً وحٓرِجة جداً لأن بتكشف إحنا هانكملها بالشكل ده والا مُمكن نتجاوز ونطيب الحياة من جديد.

ياريت تِتجاوزوا مع بعض الفترة دى وأنتم فعلا عايشينها بمُنتهى الإخلاص فى تفاصيل بعض .. ساعتها أكيد هاتكونوا بِتكمِلوا بعض وبعد شوية سنين هاتفرحوا بنجاحكُم مع بعض وهاتضحكوا مع بعض ضِحكة من القلب ولا يُمكن تِندموا أبدا لأن مفيش حٓد فِيكُم ساب التانى يبكى أو يفرح لوحده .. عيشوها بحلاوة ومُر تفاصيلها مع بعض بوردها وكبابها وفراخها المشوية بس ع الجريل مُش ع الفحم