"الحب فى الأزمات خرافة وبهدلة" للشاعرة سحر الشربينى

ماترنليش وفر رسايلك والنبى

الدنيا غليت وانت لسه يادوب صبى

والحب فى الأزمات خرافه وبهدلة

هتجيب لى شبكة منين ما تفهم يا غبى

عايز جواز وعيال ياسُمعه وقندله

زى الدولار نطلع وننزل بالبلا

يبكى الولد نشحت عليه فى السيدة

عندك حسن واللى اتعمل ف أختك عُلا

عايزنا ناكل زيهم عيش بالبصل

وأبات بعيط من دراعى اللى انكسر

ساعة ماتضبط ملى لحمه فى الرغيف

والله ما أتجوز يا شيخ مهما حصل

أنا عايشه حرة أما اتزنق بعمل رجيم

وكفاية عقلى بدون جواز لساه سليم

أحسن ما أصير طلعة دولار مطّلقة

والقلب لما يحنّ لك هسمع حليم

ديماً تبصى تحت رجلك يا منى

ديماً كده مابتحسبيش المسألة

دا ضيق مؤقت لجل نعلا بعدها

وحفكرك بس اصبرى عندك سنة

هتجوزك هتجوزك وماتقلقيش

 ويومين عسلنا حيبقوا ديماً ماتخافيش

بس أنصحك للفيس ووهمه ماتدخليش

دا بفتوى منه يطلقك من غير جواز