خالد صلاح عن الهجوم على نجيب محفوظ بالبرلمان: "السلفية فى الراس مش بالكراس"

خالد صلاح عن الهجوم على نجيب محفوظ بالبرلمان... by youm7

أعرب الكاتب الصحفى خالد صلاح، رئيس مجلس إدارة وتحرير "اليوم السابع"، عن استياءه الشديد من تصريحات النائب البرلمانى أبو المعاطى مصطفى، خلال اجتماع اللجنة التشريعية لمجلس النواب، التى طالت الأديب الكبير الراحل نجيب محفوظ، واتهام بعض أعماله الأدبية بخدش الحياء العام، مضيفًا "واضح إن السلفية فى الراس مش فى الكراس".

وقال خالد صلاح ببرنامج "على هوى مصر" الذى يذاع على فضائية النهار one: " أنا موافق إنك تيجى تكلمنى عن رقاصة بتطلع فيديو، وموافق إنك مضايق من رواية حديثة فيها كلام قلة أدب، لكن أنت ملقتش غير نجيب محفوظ اللى تعوره، وواضح إن السلفية مش بس عند حزب النور".

وتابع خالد صلاح: "الحقيقة أننى أشعر بريبة وأضع علامات استفهام كبيرة حول ما جرى فى البرلمان اليوم من الاجتماع اللذى شهدته لجنة الشئون الدستورية والتشريعية خلال مناقشة مشروع قانون بتعديل أحكام قانون العقوبات الصادر رقم 58 الخاص بقضايا النشر الخاصة بخدش الحياء العام، محدش يجادلنى فى موضوع خدش الحياء العام لأننى بصنف نفسى رجل مؤدب جدا فيما يتعلق بخدش الحياء العام، وأنا لما حد بيشتمنى بسكت ومش برد الشتيمة، لكن إن ده ينسحب على الأدب والسينما وقضايا الإبداع ده كلام فيه وجهات نظر".

واستكمل: "كان ممكن الأمور تمشى بشكل طبيعى جدا لو هما بيناقشوا فيه واحد من الروائيين كان كاتب مقال، والحقيقة إن أنا انتقدت المقال انتقاد كبير جدا، لكن الراجل خد سجن فى الرواية، بردوا المسألة فى القانون لازم ليها إعادة نظر، ونفرق بين الحاجات لأن انت النهارده عاوز يبقى فى إبداع وحريات لازم تطلق السقف للآخر، وفى النهاية القارئ أو المشاهد هو اللى عنده الكنترول وهو اللى بيعاقب اللى بيخدش الحياء العام".

واستطرد الكاتب الصحفى "أنا لا أنحاز إلى خدش الحياء العام، لكن إلى كل ما فيه قيمة عظيمة، بس أحيانا لما تكتب عن حالة راجل وست أو مشهد حب فى رواية مكتوبة ولما تيجي تسجن واحد بسبب مشهد فى رواية ده كلام بيقولنا إن فيه خلل فى ثقافة مصر وعندنا مشكلة، ولما يطلع نائب فى البرلمان يقولك نجيب محفوظ.. ده كلام يجبلك إحباط ويكسرلك كل المستقبل".