بالفيديو.. تعرف على سر الخلاف بين شذى وعبد الباسط حمودة

تعود أصل الحكاية بين المطربة شذى والمطرب الشعبى عبد الباسط حمودة إلى شهر مارس الماضى عندما استضافتهما رزان مغربى فى برنامج "الحياة حلوة" على قناة الحياة ومعهما المطرب الشعبى طارق الشيخ، وكانت جلسة الحلقة طبيعية ودمها خفيف، وفى الدقيقة 11.50 تقريبا قالت رزان مغربى "شذى إنتى بتحبى الأفراح الشعبى..صح؟"، فأجابت "أنا كان نفسى أغنى شعبى بس اللوك وشكلى مينفعش أغنى شعبى"، وهنا علق عبد الباسط "متخرجة من شيراتون ولا الميريديان..اللى مغناش فى فرح شعبى ميبقاش فنان"، ردت شذى وهى مبتسمة "والله ما غنيت"، ثم قال عبد الباسط بتلقائية "اللى مغناش فى شارع وأفراح وحفلات وموالد ميبقاش فنان.. عبد الحليم اشتغل فى أفراح وعايدة الشاعر كمان".

بعدها طلبت رزان من شذى تغنى شعبى فردت "أنا هغنى شعبى وقولولى ينفع ولا مينفعش" وعبد الباسط قال لها "غنى اللى على مزاجك" وشجعها وقال "صقفوا لشذى" وهنا غنت شذى "الدنيا دى بتحترم بس اللى عنده فلوس..أما اللى يحتاج لها بتذل فيه وتدوس" وبعد الغناء قال عبد الباسط "لأ..تمام".

وبعد 9 شهور أعادت الحكاية نفسها بعد أن علق عليها الإعلامى وائل الإبراشى أمس خلال استضافته للمطرب الشعبى عبد الباسط حمودة، ونفس الكلام وبتلقائية أعاد حمودة ما قاله، فاضطرت شذى أن تهاجم عبد الباسط على صفحتها "فيس بوك" وكتبت "أنا فنانة غصب عنك" وأضافت "بالنسبة للأستاذ عبد الباسط حمودة أنا سكت أول مرة وقولت راجل كبير وعيب أرد، شارع الهرم اللى بالنسبالك مقياس والموالد اللى واضح أن من كتر ما غنيت فيهم مضيقينك، فبتحاول تعمل فيها متقبل الموضوع وبتقول وترد على نفسك".

وأضافت: "أساسا محدش عاب على اللى بيغنوا فى موالد ولا شارع الهرم، ما كل واحد يغنى مكان ما هو حابب، محدش يقدر يقيم حد ولا يحكم على حد.. أنا فعلا محالفنيش الحظ الفظيع إنى أغنى فيهم أعملك إيه طيب؟..إنت ليه بتحاول تعمل حوار وموضوع، للأسف ياسى عبد الباسط أنا مغنتش فى موالد ولاغنيت فى شارع الهرم ولا كنت مع اللى راحوا الهرم ولا بتنصل، والواقع أن فى اختلاف ثقافات وتربية وأسلوب".

وتابعت: "وبالنسبة لأنك فجأة عملت فيها "بيتهوفن الفن" فأنا غصب عنك فنانة مش عافية منى، ومش رأيى دا رأى الجهات المحترمة المعنية بالفن المحترم، زى دار الأوبرا اللى اتشرفت وكنت صوليست فيها.. وطبعا مش هتفهم يعنى إيه صوليست، فهترجمهالك بلغتك يعنى بقدم "نمرة لوحدى" على أوركسترا بيقودها دكتور سليم سحاب، وواحدة تانية كان بيرؤسها الدكتورة رتيبة الحفنى الله يرحمها".

واختتمت "شذى" قائلة: "فلو سمحت لما تطلع تاكل عيش فى البرامج، متحكيش فى المحكى وتجيب فى سيرتى وتبروز نفسك، لأنك نص معلوماتك الفنية فى الحلقة رايحة فى داهية.. وطبعا أكيد مش هتفهم ولا حرف من اللى أنا كتباه ده، لأن أساسا الأغنية اللى ضربتلك وأتعرفت بيها كنت أساسا تايه فيها..وطول مدة الأغنية مش عارف نفسك، يعنى واحد طول الأغنية بيقول "أنا مش عارفنى أنا تهت منى" هعتب عليه فى إيه، والنبى لما يلاقى نفسه بقى نبقى نتفاهم".