هيثم عرابى معلقاً على أزمة "متعب وزيزو ": "الموضوع بسيط وبيحصل فى كل الأندية"

كتب هيثم عرابى مدير مشتريات النادى الأهلى السابق منشورا عبر حسابه الشخصى بموقع التواصل الاجتماعى فيس بوك، معلقاً على أزمة عماد متعب مع عبد العزيز عبد الشافى المدير الفنى للفريق، والتى على أثرها قام الأخير باستبعاد الأول من مباراة القمة القادمة.

وكتب عرابى: "اللى يقولك إن اللاعيبة ما بتقراش اللى بيتكتب على صفحات الأهلاوية على الفيسبوك أو فى الإعلام أو مش متابعين متصدقش .. اللاعيبة بتقرأ كل كلمة وبتشوف كل حرف بيتكتب ومتابعة كل شيء..موضوع عماد متعب وصالح جمعة والكابتن زيزو بسيط وبيحصل فى كل الأندية .. والمخطيء ف الآخر بيتحاسب ..عماد متعب لاعب محترم جدا وتاريخه طويل وكلنا عارفينه".

وأضاف عرابى " صالح جمعه عنده حماس شديد وعاوز يكون له دور فى الفترة اللى جاية وده حقه، الكابتن زيزو أنا واثق مليون فى المائه إنه قادر يدير المركب وإنه يعالج الأخطاء ويتعامل مع أى حد يخرج عن النص مهما كان الاسم مين لأن مفيش حد فوق العقاب لو أخطأ ,عندك ماتش مهم جدا وعلى أساسه هتتحدد حاجات كتيرة وبالتالى دورنا حاليا إننا مانكبرش الموضوع ونسيب المسئول عن الفريق يحلها ويعاقب المخطيء ونقف مع فريقنا فى ماتشه الجاي".

وتابع "بالتوفيق للفريق إن شاء الله ف ماتش القمة وماتنساش إنك مابتشجعش أشخاص .. إنت بتشجع الكيان وبتحافظ عليه وخاصة فى أى موقف صعب أو وقت حرج وكل حاجة ولها وقتها مفيش حد فوق النقد ولكن الذكاء فى امتى تعمل ده عشان تكون بتساعد فريقك ".