سألنا الستات مثلتى على جوزك فى إيه وقت الخطوبة؟ قالوا الأكل والعطس

"يا دبلة الخطوبة عقالبنا كلنا ونبنى طوبة طوبة فى عش حبنا" الكلمات التى تغنت بها كل فتاه كانت تحلم بحلم الزواج، وكانت هذه الأغنية اولى خطوات الفتيات فى الحصول على جائزة الأوسكار كأفضل ممثلة خلال فترة الخطوبة، خاصة أن كل فتاه تحاول أن تظهر الجانب الجميل فى شخصيتها وطبيعتها، و تخفى اى شىء من الممكن أن يجعل العريس "يرجع فى كلامه"، ولذلك تحاول دائماً الفتيات أن يقدمن شخصيات لاتمت لشخصياتهن بعد الزواج بصلة، ليجد العريس نفسه بعد الزواج أمام فتاه لا يعرف عنها سوى اسمها فقط.

ولهذا سألنا عدد من الزوجات "مثلتى على عريسك فى ايه وقت الخطوبة؟".. وإليك الإجابات..

قالت منى محمد 25 سنة متزوجة منذ 3 سنوات " مكنتش بمثل كتير أوى، بس فى حاجات كنت بتكسف أعملها قدامه زى الأكل، لما كان يجى عندنا ونيجى ناكل أقول انا شبعت جداً، و أول ما ينزل أقوم أكل على طول، ولما كنا بنتغدى بره البيت أفضل أقوله لأ هاتلى سندوتش صغير عشان مش بقدر أكل الكبير، وبروح أكل لأنى طبعاً مش بشبع، وبعد الجواز اتفاجئ بأكلى".

وقالت هدير عطية 28 سنة متزوجة منذ عامين "من يوم ما اتعرفت على جوزى وانا بتكسف أعمل حاجات كتير قدامه، و أول حاجة كنت دايماً اخلى بالى منها، هى موضوع العطس و أفضل كاتماه عشان معملش صوت خالص، ولما يكون عندى برد مكنتش أخليه يشوفنى خالص عشان أخد راحتى لو عندى رشح و زكام، مش بقدر أمسك المنديل قدامه، لكن دلوقتى خلاص هعمل ايه بقى بيشوفنى وعادى".

بينما قالت إيمان السيد 32 سنة متزوجة منذ 8 سنوات" مكنتش بمثل كتير فى الخطوبة بس فى حاجات مكنتش أقدر أعملها قدامه، زى أكل المانجا والسمك، لدرجة إنى أقنعته إنى مش بحب السمك أصلاً عشان ماضطرش إنى أفصص قدامه و إيدى تبقى ريحتها وحشة.

وطبعا الفسيخ والرنجة نفس الكلام وكان مندهش إن فى بنت مش بتحب الحاجات دى، والمانجا أشربها عصير اه، لكن أكلها أقوله مش بعرف لازم ماما تقطعهالى فى كوباية، وبعد الجواز اكتشف إنى بحب السمك والفسيخ جداً وفضل يضحك وقال لبابا انا ممكن أرجعها دلوقتى".

أما سها جمال 30 سنة متزوجة منذ 3 أعوام فقالت "تقريباً انا البنت الوحيدة اللى عمرها ما شتمت قدام خطيبها ولا قعدت بلبس بيت قدامه ولا حتى لبست شبشب، المشكلة دى انا اكتشفتها من اول ما اتخطبنا مع إننا كنا متجوزين عن حب، وكل مرة أقول فيها ايه لو شتمت شتيمة عادية يا حمار يا كلب، كنت بتكسف أعلى صوتى أو يشوفنى باللبس بتاع البيت، وأول ما اتجوزنا واتفرجنا على ماتش مع بعض لاقانى عمالة أشتم فضل مستغرب فترة، و زعل منى إنى مكنتش بتعامل معاه على طبيعتى وبعد كدة خدنا على طباع بعض".

وقالت سارة صالح 27 سنة متزوجة منذ عام واحد "الموضوع مش موضوع تمثيل لكن المشكلة، إنك تحس ان فى حد لسة غريب عنك، انا بالنسبالى كنت بتكسف أكل قدام خطيبى، أو إنى اعيط قدامه، وطبعا إنى أكح أو أعطس أو أكل بصل وبتنجان وكدة، بس فى آخر الخطوبة بدأت أخد عليه وابتديت أفك تدريجياً".

موضوعات متعلقة:

يا دبلة الخطوبة كان شكلك كان إزاى من 100 سنة؟ مراحل التطور عبر التاريخ

5 هدايا هينفعوا صاحبتك العروسة .. أهمها "مكواة الشعر"