مها نور تكتب: همسة.. السر اللى حيرنى

همستى النهاردة عن كلمة حيرتنى من وأنا صغيرة مكنتش فاهمة معناها وإيه المقصود منها، زمان كنت أسمع الناس الكبار زى امى وجدتى يقولوا كلمة حيرتنى اوى فلانة احلوت بعد الجواز وبقت زى القمر ولاشوفتى التانية مالها اتغيرت كدا دى كانت زى القمر يعينى شكلها كبرت عشرين سنه وبقت عاملة زى الست الحزينة بعد الجواز والخلفة وهدة العيال
مين فيكو لسه بيسمع الكلام ده زمان وأنا صغيرة ماكنتش فاهمه معنى الكلام ده ايه وليه دى احلوت وليه دى اتغيرت واتبدلت
بس بعد ما كبرت وفهمت عرفت السر اللى حيرنى
مكانش الجواز ولا العيال والخلفة والمسؤولية ولا حتى تغير الهرومونات فى الجسم بسبب الجواز
لكن اللى فهمته ان السبب الرئيسى اللى غير الاتنين وقادر يغير اى ست ويحولها لـ أميرة وملكة جمال "هو جوزها" شريك حياتها وهو نفسه اللى قادر يحول اجمل ست فى الدنيا لست عجوزها فى عز شبابها.

الراجل هو المصباح السحرى فى حياة كل أنثى هو الميه اللى بتروى الورده بالكلمة الحلوة والحب والمعاملة الطبية الورده وقتها هتبقى اجمل ورده فى بستان الحب هيتمتع بريحتها الجميلة لكن لو اهملها ومنع عنها ميه المحاياة هتتبدل وتتدبل وتموت حافظ عليها ورعيها الست زى الارض كل ما ترويها هتطرح جنة.