بيشوى مجدى يكتب: إهداء لـــ.. محدش

بشكر كل من قال شىء
وبشكر كل شىء إتقال
إزاى الحال.. الحال عال
وعالـــ مواعيد بقول سلام
بشكر كل شخص كلام
وكل واحد لام..
عليا عشان سابنى أضيع
وبشكر كل ( ل).. إتشالت من كلام
وعرفت ساعتها بــ..كام
الناس تشترى وتبيع
شكرا على كل المواضيع.. وعلى النسيان
أنا فعلا كنت جبان
وخُفت أخسر فــ إتكسرت
ولما إتكسرت خسرت
وسرت ويا الناس.. فصرت عكس ما عايز
أنا جايز مش محتاج
شكرا لكل علاج.. كان نهايته موت
علشان بدايتُه منكم
شكرا لكل تابوت
كان فاصل بيننا وبينكم
أنا واحد إحتاج لمحدش
ومحدش ما إحتاجنيش
وكل من إحتاجنى أساساً
كان واحد محتاج نيش
مجرد زياده أو.. سد لفراغ الجو
شكرا لكل لو..جعلت بيننا حد
شكرا للى هد.. وكل سد
كان عالى ما بيننا لفوق
وشكرا لعداد فراقنا
وشكرا لكل عد
و إن كنت ( محدش ) بالنسبه لكم
فــ..محدش بيموت ناقص حد
اسم الراسل: محدش