عدلى حسن أحمد يكتب: 30 يونيو.. فى يوم تحريرك يا مصر

شوفتى يا مصر ولادك
بحبك قد إيه مغرمين
شوفتى الأصل الطيب
والناس المخلصين
شوفتى فى يوم تحريرك
ف عيونهم قد إيه الحنين
شوفتى غالية قد إيه
على قلوب المصريين
أهى دى يا مصر ولادك
يا غالية على كل دين
أهى دى يا مصر ولادك
اللى م نيلك شاربين
اللى عبروا بيك للنصر
واتحدوا كل الحاقدين
دول ولادك يا مصر
جرجس وعبدالله وحسين
اللى فى الشدايد بتلاقيهم
بشهامة جنبك واقفين
اللى حلمك هو حلمهم
ولفرحك دايماً متشوقين

الكل متساوى فى حبك
الكل على أرضك أمين

ولا عمرك فرقتى بينهم
كلنا باسمك متسميين
قومى يا مصر وروقى
واخلعى التوب الحزين
دم ولادك مش هيضيع
ومهما سكتنا مش ناسيين

قومى يا غالية وهمى
نسبق بيك السنين
نزرع تانى ونبنى
نعلى بيكى فوق الحاسدين
يلا قومى وصبحى
ع الوشوش الطيبين
ياللى نهارك نسمة حلوة
يالى شمسك ضى العين
عايشين فى حضنك كلنا
واقفين يا غالية ومتشمرين
حالفين بدينا ودمنا
ما يدوسك تانى غدارين
يا أم الجوامع والكنايس
وصليب وهلال متوحدين
يا أرض المحبة والسلام
حقك علينا دين