سيناريو تخيلى.. ماذا لو قررت أنجلينا جولى الفضفضة لأسامة منير.. أنجلينا:استحملنى 12سنة بس الخيانة وحشة.. وأسامة: إديله فرصة تانية..وإهمالك لاحتياجاته وانشغالك بالأعمال الخيرية أهم أسباب انهيار العلاقة

بعد أزمة أنجلينا جولى وبراد بيت، وطلبها الطلاق منه انطلقت التعليقات الساخرة من قبل المصريين، ورددوا أن السر وراء تخلى أنجلينا عن حب حياتها يرجع لخيانته المتكررة لها، ولكون المذيع أسامة منير ملجأ المجروحين والذين تمت خيانتهم بمصر وبعض أنحاء العالم، بل يعد العقل المدبر الذى يتوقف على رأيه بعض العلاقات العاطفية، نرصد فى سيناريو تخيلى تفاصيل مكالمة أنجلينا جولى لفيلسوف الجيل أسامة منير، وإلى نص المكالمة:

أسامة منير

- الخيانة.. الخيانة أبشع شعور ممكن يمر بيه الإنسان سواء الراجل أو الست، فتبقى الخيانة خيانة فى النهاية ونستقبل أول اتصال تليفونى معانا النهاردة ونقول ألو:

- ألو أيوة يا أسامة

- أتعرف بيكى

- أنا واحدة كل الدنيا اتكلمت عن قصة حبها الجميلة مع جوزها، اللى غدر بيها وخانها فى الآخر.

- طيب واحدة واحدة كده اسمك إيه؟

- أنجلينا

- أنجلينا اوعى تكونى اللى فى بالى؟

أنجلينا جولى

- هى يا أسامة أنا أنجلينا جولى، فكرت كتير قبل ما أكلمك ونصحتنى صديقة مقربة بتسمعك إنى أتواصل معاك لأنك أكتر حد هيقدر اللى أنا فيه ويساعدنى آخد قرارى النهائى.

- أنجلينا فى بداية المكاملة اتكلمتى عن قصة الحب العظيمة اللى عشتيها مع براد، وقولتى إنه خانك، حابة تقولى إيه؟ أنا سامعك.

- أسامة أنا مبنكرش إن براد عمل عشانى حاجات كتير واتحدينا الدنيا عشان حبنا وكان بيحاول يفرحنى بكل الطرق، من أول ما طلق مراته عشانى، وإنه استحملنى 12 سنة بكل جنونى، لحد وقفته معايا فى تعبى، بس الخيانة وحشة أوى يا أسامة مش قادرة أتحملها، هدت كل حاجة ليه جوايا.

أنجلينا جولى وبراد بيت

- أنجلينا عرفتى إزاى إن براد بيخونك؟

- من زمان كنت حاسة.. الست بتحس بجوزها وتغيره معاها بس كنت بكذب نفسى وأقول يا بت هو بيحبك متدخليش شيطان ما بينكم، وكنت بعدى نزواته وهفواته، وبقيت أركز فى حياتى وأطفالى وأعمال الخير عشان متعبش أكتر، لحد ما الدنيا كلها عرفت إنه بيخونى، وبعد ما كان بيخاف على زعلى بقى ولا يفرق معاه، عارف يا أسامة مثل "أعلى ما فى خيلك اركبيه"، حالنا بقى كدة.

- أنجلينا خلينا نتوقف عند جزئيتين من كلامك قولتيهم إنك عرفتى نزواته وعدتيها وشغلتى نفسك بالأولاد وأعمال الخير، ودا الغلط بعينه، كان لازم يكون ليكى موقف وتقوليله بص يابن الناس أنا واحدة صاحبة مرض وكتر ألف خيرك، وقفت جنبى بس دا مش معناه إنى أقبل بخيانتك ليا، احتراماً لأولادنا يا تعقل وتعيش للإنسانة اللى اخترتها، يا كل واحد مننا يروح لحاله، لكن إنتى اتنازلتى عن حقك وسكتى مش بس كده دانتى انشغلتى فى تعبك غصب عنك، لكن كمان انشغلتى فى عمل الخير وهو زى أى شاب ليه متطلباته، انتوا الاتنين غلطوا فمترجعوش تعيطوا.

- أسامة طب هو بعد ما طلبت الطلاق ساق طوب الأرض وعايزنى أسامحه وطلع فى كل الصحف العالمية وقال إنى مجنونة، بس لسه بيحبنى ومش عايز يطلقنى ومحتاج فرصة تانية، إنت إيه رأيك؟

- بصى، هو بيقول الكلام دا عشان حس إنك هتضيعى من إيده، ووجودك اللى كان ضامنه أصبح فى خطر، اسمعوا بعض وفكروا فى أولادكم وفى كرامتكم، لو هترجعيله لازم يثبتلك إنه مش هيخونك تانى مهما حصل، وإنتى كمان إديه شوية من وقتك ومتدفعيهوش إنه يخونك، غير كدة كل واحد من طريق، ونروح لفاصل مع آمال ماهر "اتقى ربنا فيا " ومستنيين تعليقاتكم ورسايلكم لو كنت مكان أنجلينا هتعمل إيه؟

أنجلينا وبراد وتوأمهما