چيهان جمال تكتب: ده بجد !

كيف تصنع من أحزانك كوكتيل نجاح ؟!

صحيح كيف ؟!

أنت هاتفلسف !

نفعتك فى أيه الفلسفة

تقدر تقول

 والله إللى ماعرفوا أى حاجة عن الفلسفة

ولا عن أى حاجة فى أى حاجة...

كانوا واعيين وأشطر منك !

طيب...

إزاى يعنى ؟ !

أقولك

ماحبكوهاش بشوية الأحساس

 وحبتين المروئة إللى خلصوا عليك

لااا.. خلصوا عليا ده إيه !

أنا ماخلصتش.. أنا أهو

أنا.. أنا

أنا إيه صحيح ؟!

أهو السؤال ده أكيد صح جداً لأنك بعد فترة مُعينة من مرور سنوات حياتك وبعثرتها من بين إيديك وتفريطك فى أيامك

إللى عِشتها بِكُل حُب

أوقات مُمتن

لكن للأسف امتنان زيادة عن اللزوم

زيادة عن اللزوم إزاى

أقولك إزاى

لما بتعمل حاجات حلوة مع أى حد بتشوفه مُمتن قوى ذيك كده ؟

صحيح..

بسيط جداً منهم بيكون مُمتن زيى بالظبط لكن الأغلبية الساحقة الماحقة

 مُش قوي

 أو مُتنازل لأنك شايف أنه واجب فتلائى نفسك وبمنتهى الرضا والسماحة

حطيت المسكينة روحك على الرف سنين وسنين

وحتى لما حاولت تقول يافكيك

فكيك هو كمان" أربجك وكتفك " ياجميل

 فماعرفتش... تفك... فرجعت....

وباردوا كُل ماتحاول تعيش..

تعيش بس

يعنى تتنفس من غير خنقة..

أو حتى تحاول تستطعم طعم الإيام

هاتلائى مفيش.. مفيش

ولا الهوا فى ولا حاجة

ماهو انت ياجميل مش ملك روحك

أنت ملكية عامة

فتلائى مرؤتك تشدك تانى وتانى

وبعدين تقف الوقفة دى كُل فترة وتسأل

أنا إيه ؟!

أنا فين؟

 أنا مين ؟!

فى كُل ده أنت طبيعى.. أطمن أنت أنسان

لكن هى دى الدنيا ياجميل

شوية أحباطات على حبة تنازلات

على كمية من المسئوليات

أو يمكن تتدافع عليك مجموعة من السخافات وتلائى نفسك مطلوب منك تسدد حبة فواتير على حبة حاجات أاااااد كده

وللأسف مش بتاعتك

طب ياجماعة أنا أكلت أيه

عشان أشرب عليه ماية ؟!

أشرب ياجميل

دى أتعابك كلها نظير

الشهامة والجدعنة وشيل الحمول

إيه.. إيه حمول تانى

ماكفاية حمول !

أنا عايز حلول

طب مُش أنت إللى قررت من زمان

أنك تقف وتصد وتشيل.. شيل ياحلو !

طيخ.. طاخ.. طوخ

أاااااه يا أنا

لاااا والنبى بلاش

شيل ياجميل..

حاضر

يا قوى يارب..

لِسَّه فيك حِيل

بإذن الله.. قول يارب

ماتبقاش سخيف أنت كمان

طول مافيا نفس

وليا رب أسمه الكريم

أكيد فيا حِيل..

وأكيد ليا غالى محتاجنى

وعشان خاطر نور عينيه

لا يُمكن أبداً أنهد

طب أااااااركن هنا

وبص من بعييييد عشان تشوف صح..

كده تمام

تمام قوى

لازم هنا ياجميل

هاتوقف شوية..

هاتُقعد شوية..

وتسترجع كُل إللى فات

وهاتسأل نفسك ياترى أنا كُنت مين فيهم ؟!

وماتجاميلش نفسك.. !

قول الحق عشان ربنا ينجيك..

طب والله العظيم تلاتة بالله العظيم

كنت أنسان.. كُنت بجد..

أحب بجد.. أجتهد بجد.. أقف سند بجد..

طب ده أنا عملت أكتر الحاجات بجد..

والله العظيم أنا جيت على نفسى بجد

 أنا مُتأكد !

وحتى لما شيلت الشيلة

أدينى شيلتها بجد

مفيش هزار

وحتى " الصبر" صاحبته بجد

من زمان صاحبت " الصبر "

حتى من قبل ماعرف أسمه !

طب أنت عارف

أنا زعلت كتير من زمان قوى

حتى من قبل ماعرف يعنى إيه زعل

ولما كبرت عرفت إنى ما ينفعش أقول زعلت

أنا ما زعلتش!

أيوه والله حقيقى

أنا بتكلم بجد

ولما يكون الكلام جد ماينفعش أقول زعلت..

زعلت دى كلمة بريئة كُنَّا بنقولها وأحنا صغيرين

لما كانت كُل الحاجات بسيطة ومُش بجد

 أنا من فترة كده حسّيت أنى حزنت..

أيوه كده صح " حزنت "

حزنت بجد.. ولما حزنت بجد

فهمت

وعشان كبرت وفهمت

وكان لازم المرة دى بالذات أختار

فكان أكيد هاختار صح

هاختار بجد

فا أختارتنى..

أيوه أنا الجميل إللى لازم أحبنى بجد

وعملت من كُل الحاجات إيلى تخصنى جداً وبتاعتى بجد حاجة بجد

وعشان أنا بحب الحياة بجد

هاسميه "كوكتيل نجاح"

يارب أقدر أستمتع بيه وأحس بيه بجد "يارب "