بالفيديو.. "على هوى مصر" يعرض تسجيلا صوتيا لمصطفى النجار يستهزئ بالبرادعى

"على هوى مصر" يعرض تسجيل صوتى لمصطفى النجار... by youm7

عرض الكاتب الصحفى، والنائب البرلمانى، عبد الرحيم على، خلال استضافته ببرنامج "على هوى مصر" الذى يقدمه الكاتب الصحفى خالد صلاح، عبر فضائية النهار One، مكالمة تليفونية دارت بين كل من الناشط السياسى مصطفى النجار، والدكتور أحمد شكرى، يستهزءان خلالها من الدكتور محمد البرادعى، ويعرضان خطتهما للمجئ به رئيسا للبلاد.

وإلى نص المكالمة..

شكرى: آلو

النجار: دكتور أحمد شكري

شكرى: حبى.. طمني

النجار: فاتتك قعدة تاريخية

شكري: ياااه بقى متقعدش تعذبنى.. قولى إيه اللى حصل

النجار: مفيش جديد عادي

شكرى: أيه يا عم أنا كلمت عبدالمنعم قالى إيجابية جدًا وبتاع

النجار: الواد عبدالمنعم ده سطحى آخر حاجة.. وفعلاً أنا بفكر أمشّيه من الحزب عشان منفوخ منه

شكرى: بقوله إيه الأخبار؟ قالى أنا فى المواصلات.. ومش هقدر أتكلم.. قولتله يعنى أيه إيجابية.. قالى آه إيجابية جدًا جدًا

النجار: لا.. بص هو أهم حاجة وصلنالها أقنعته إن إحنا لازم نلعب سياسة ونبقى براجماتيين

شكرى: صح كده

النجار: تمام.. طيب.. فقولتله إحنا دلوقتى عمرو موسى رايح جاى.. نقعد معاه ونسمع منه مفيش مشكلة.. بس كده كده إحنا مش "انفولدد" معاه.. ولكن

شكري: الكلام على مين

النجار: عمرو موسى عايز يتغدى معاه.. قولتله اتغدى معاه متتغداش معاه ليه!

شكري: آه بالضبط

النجار: آه قولتله مرشد الإخوان نقعد معاه نشوف أولهم وآخرهم إيه.. ومعانا ولا مع عمرو موسى

شكرى: آه

النجار: الحاجة التانية إحنا دلوقتى مين اللى موجود نستوعبه.. هشام البسطويسى عايز يبقى ريس تعالى.. هشام بسطويسى أنت هتبقى نائب الريس

شكرى: آه

النجار: أحمد زويل تعالى أحمد زويل إنت كده كده الدستور بيقول إنك متنفعش ريس ولا نائب ريس فتعالى رئيس وزراء

شكرى: آه

النجار: واخد بالك.. فاقتنع "البوب" الصالح قالى إبدأ اتصالاتك

شكرى: تمام.. فاااا هنبدأ اتصالاتنا

شكرى: ها

النجار: عايزين مدير وبتاع وكلام كده.. فقولتله والله مفيش

شكرى: إيه.. هتبدأ اتصالات إيه؟

النجار: أكلم بقى هشام وأكلم الناس ديه يعنى.. وأبو الغار هيكلم زويل

شكري: آه

النجار: وهنشوف بقا

شكرى: حلو

النجار: فاهمنى أنت الديل دوت

شكرى: تمام

النجار: يعنى عشان لما نعمل المؤتمر الصحفى للترشح للرئاسة نلاقى زويل واقف جنبه نلاقى فاروق الباز نلاقى هشام البسطويسى وإحنا يبقى كده خلصت

شكرى: تمام تمام

النجار: بس.. والله العظيم يا ميدو يعنى هنجبهولك رئيس يا ميدو.. هنجبهولك رئيس بس يعنى ربنا يسامحنا يا ميدو

شكرى: جبت سيرة الحزب ولا مجبتش

النجار: لا لا مجبناش سيرة الحزب خالص.. بس بسرعة قولتله إحنا كده كده شغالين فى موضوع الحزب، ولازم كده وده مش حزب البرادعى وأكدت عليه كده.. بس فى البلاااالة يا عم على يا عم.. يخرب.. أبوس إيدك والنبى خلى على يسافر

شكري: ليه بس قاله إيه.. قال إيه؟

النجار: مفيش يا عم لسه بيفكر بنفس الشكل الغلبان قوى.. مسكين يا أحمد مسكين

شكرى: اللى هو إيه بس طمنى.. قولى

النجار: اللى هو كده.. الشكل اللى هو إيه طريقة التفكير نفسها

شكرى: زى إيه يعنى

النجار: بشكل عام يا أحمد

شكرى: اللى هى طب شوفوا كده.. صح؟

النجار: آه آه اللى هو مفيش كده طب نعمل إيه.. قولتله لا.. هجيب مروة.. مروة مفرغها

شكرى: آه

النجار: مروة مفرغها تيجى تخدلها 2000 دولار فى الشهر.. تقعد تعملنا كده.. بيقولى واحدة اسمها جليلة عايزة تساعدنا وبتاع.. قولتله بص ولا جليلة بلا جليلاشى.. مروة.. قولتله مروة راحت معايا مركز المعلومات واتخاذ القرار.. البنت قعدت هناك ثبتت كل الناس.. العلم اللى عندها والكلام اللى عندها يعنى محدش فى مصر عنده للأسف يعنى.. والله العظيم يا أحمد.. قعدت معاهم يخرب بيت كده.. الناس دى وقعوا يعنى بس.. فقولتله بس على الله أصلاً مروة ترضى أصلاً

شكري: دلوقتى أنت رايح العاشرة مساءً.. ولا رايح فين

النجار: اااا لا أجلنا العاشرة مساءً لبكره.. قلنا نستنا ونشوف تطور الأحداث أيه.. ضربوا الناس عند لاظلوغى جامد على فكرة

شكرى: ااه بس فى كلام إن اللى هناك ناس بلطجية.. مش بلطجية ناس من المنطقة يعنى ناس كده على تويتر

النجار: مش عارف لسه هنتأكد

شكرى: أنت رايح فين رايح فين

النجار: أنا فى أكتوبر دلوقتى روحت البيت.. عشان أقعد أكتب كام مقال كده وقاعد أكتب الرموز الحزبية اللى هنخدها معانا

شكري: لا لا عايزين نتكلم فى موضوع الحزب ده ضرورى.. فيه حاجات كتير إحنا أنجزناها امبارح وفى حاجات عايزين نعرف الخطوات يعني

النجار: طيب ما تخلص شغلك وبتاع وتكلمنى متأخر شوية.. ساعة كده ولا حاجة أدخل البيت أقلع هدومى وكده يعني

شكري: ماشى ظبط نفسك كده وادينى رنة وأطلبك أنا.. فى حاجات دلوقتى.. وحاجات إحنا وصلنالها امبارح.. ونحط شوية نقط على الحروف وكده وخلاص.. ماشي

النجار: طيب ماشى ماشي

شكري: بس خلص فضى نفسك كده وادينى رنة

النجار: طيب

شكري: حاول تستعجل سلام.