الحاج أحمد عبد العليم "بالبدلة والكرافتة" من العمل بالمصنوعات الجلدية وتفصيل أحذية "أم كلثوم" لـ"بيع البخور والسبح"أمام المساجد.. 89 عاما لكنه "ميقدرش يعيش من غير شغل"

كتبت سلمى الدمرداش

السبت، 21 يناير 2017 02:24 م

بشرة سمراء تركت عليها الشمس بصمتها، ولحية بيضاء تنم عن سنوات عمر تخطوا حاجز الـ80 منذ فترة، بخطى مرتعشة وظهر نخر الزمن فى عظامه حتى تركه بانحناءة كبيرة يقف الحاج أحمد محمد عبد العليم بشارع البطل أحمد عبد العزيز عقب صلاة الجمعة من كل أسبوع، وهو مرتدى جاكت بذلته الأنيق ورابطة العنق التى علمته الخبرة فى ارتدائها إحكام ربطتها وهو ينادى ليبيع بضاعته "بخور وسبح".

الحاج أحمد بزيه الأنيق

كرسى صغير يسهل فتحه وغلقه وكيس بلاستيكى يحتوى على علب بخور ومجموعة من السبح، هذه هى أدوات الحاج أحمد التى يصطحبها يومين فى الأسبوع هما الثلاثاء والجمعة ليبيع السبح بمنطقة المهندسين، لينفق على منزله بعدما ترك عمله فى واحد من أكبر محال المصنوعات الجلدية بعد تقدمه فى العمر.

"أنا كنت بشتغل فنى مصنوعات جلدية فى أكبر محل فى وسط البلد" قالها الحاج أحمد بصوت مبحوح نظرًا لضعف سمعه الشديد فى بداية حديثه لـ"اليوم السابع" عن حكايته وقال: "أنا اتعودت أشتغل وأنا لابس البذلة والكرافتة لأنى كنت بشتغل فى مستوى راقى فى محل فى وسط البلد وكنت بسافر أوربا على طول عشان نشوف موديلات الشغل ونجيب بضاعة، ومبقدرش أنزل أشتغل غير بلبسى ده".

الحاج أحمد عبد العليم

وأضاف "مشاهير مصر كلهم كانوا زباينى، وكان من أهمهم كوكب الشرق أم كلثوم كانت بتيجى المحل وتفصل أحذية خاصة ليها وموديلات معينة وشنط كمان وده كان أيام الرخص كان حسابها كله مش بيزيد عن 25 جنيه، وكنت بتعامل مع أهم الفنانين لأنى كنت محترف فى شغلى".

الحاج أحمد يجلس بشارع البطل أحمد عبد العزيز

وتابع "أنا مواليد 1928 يعنى عندى دلوقتى 89 سنة، والحمد لله عندى 7 بنات كلهم متجوزين ما عدا واحدة مصابة بشلل رباعى، وبناتى كلهم معاهم ليسانس وبكارليوس، أنا بنزل يوم الثلاثاء بعد صلاة الظهر أبيع السبح والبخور عند جامع أنس بن مالك، ويوم الجمعة باجى هنا عند جامع مصطفى محمود وهو ده شغلى وباقى الأسبوع مش بقدر".