أمانى الخياط: أحمد شفيق يصطاد فى الماء العكر

هاجمت الإعلامية أمانى الخياط، الفريق أحمد شفيق المرشح الرئاسى الأسبق، بسبب تعليقه على حادث الواحات الإرهابى، وقالت: "مين قال لحضرتك انو كمين منعزل ويا ترى انت فاكر مصطلحاتك العسكرية ولا نسيتها".

وتابعت أمانى الخياط، ببرنامج "بين السطور" المذاع عبر فضائية ON LIVE: "ما تاريخك معروف ولا هى الناس بتنسى.. لو اللحظات الزمنية سترتك أنت بتنسى.. طب انت نسيت كام مرة تم توقيفك فى المطار وكنت فى سيارتك بمفردك.. حضرتك قاعد فى البلكونة وبتشرب نفس مشروبك ومفيش حاجة اتغيرت وبتكتب.. وليه مطلوب مننا إننا نتحمل فقط".

واستكملت: "انتو رأيكم إن أحمد شفيق بيصطاد فى الماء العكر وبلاقى لنفسه مكان؟ مين فيكو مستعد يسمع الأداء ده؟ وليه الناس دى من حقها تضغط على جرحنا فى الوقت اللى بتختاره؟ ما أولادنا راحوا علشان نعيش.. العملية دى بالأسلحة دى كان مطلوب تبقى جوه علشان يبقى التعامل مع مدنيين علشان الغرب كله يقول مصر غير مستقرة وكان المطلوب إن صورة الدم تبقى كبيرة جدا".

واستمرت أمنى الخياط فى هجومها قائلة: "انت مين وبقى عندك كام سنة.. انت كنت قاعد مع وزير الداخلية فى غرفة العمليات وعرفت إن ده كمين؟ كله بيفتى.. وفين الناس اللى كانت بتسمى نفسها اصل إحنا مع الفريق شفيق.. ايه رأيكوا؟ إزاى الدولة بتشيع شهدائها بالمهابة دى وبتضحى بأولادها، وواحد قاعد رجل على رجل وبيعرف يعمل تليفون لمذيع أو مذيعة تروح تعمل معاه حوار من حقه فجأة يدخل جرحنا ليه هو مين؟".

وتساءلت أمانى الخياط حول مصادر دخل الفريق أحمد شفيق، وأردفت "كلمة فريق على راسى من فوق.. لكن هو ترك الحياة العسكرية من امتى.. وهل انت جاهز لتحليل دم يقول جاهزيتك لأى شئ أم الاصطياد فى الماء العكر على حسابنا إحنا وحساب أولادنا".