حمدى الغفير يكتب: هى اسمها "مش كلت" ولا "مكلتش"

الجدعات الحلوات اللى مش ممحونات، وحشتونى جدًا الواحد مش عارف لولا وجودكن معانا كنا هنبلع كمية الأوفر دى ازاى، طبعا كلكم عندكم صاحبتكم المسهوكة اللى فقعاكم وفقعانا، ممكن تكون جارة أو صديقة أو قريبة أو مرات اخوكى، دى بقى انا حابب اتكلم عنها النهاردة عشان الكيل زاد بينا وطفح انتى  شخصيًا كبنت بتلاقى إن طريقة كلامها غريبة متفهميش هى مسهوكة ولا معاقة.

يعنى من ضمن كلام كتير بيطلع كأنه فى صمغ محدش فاهمه، تلاقى البت من دول تقولك "مش كلت، مش قدرت أروح، مش حطيت روج"، يعنى المهتمين باللغة والناس العادية حاولوا يلاقوا تفسير واضح للطريقة دى فى الكلام وللأسف فشلوا، يعنى هل البنات دى عندها عجز فى لسانها مبتعرفش تحط "تش" فى آخر الكلمة فتبقى "مكلتش" عادى زينا، يعنى هل دى حالة مرضية فنقول إن لا حرج عليهن ونهبط كلنا، ولا هي نية مبيتة للفقع الهدف منها استيراد مرارة نيكل.

نيجى بقى لرعاة كلمة "يا بيبى" تبقى صاحبتها جنبها زى البهيمة ودى تقولها أيوة يا بيبى، طب انتى عارفة إن شكلكوا وحش وسخيف ومحدش بيقول عليكى رقيقة دول بيحطوكى فى قائمة المتخلفين عقليًا، نسيب بقى كل ده ونيجى عند "الكهن الأعظم" مين بقى يقدر ينسى بقى رائدات المرقعة المقننة على فيس بوك بتوع "بجد مش قادرة" كل حاجة بيردوا عليها بنفس الجملة وريأكت قلب أو قرد مكسوف، لو فيه بوست لحد مات بيعلقوا"يا عينى بجد مش قادرة" معلش يعنى ردى عليا هنا مش قادرة من ايه؟، دى ناس عندها ميت انتى مالك بقى يعنى أزمتك فى ايه فمش قادرة؟!

ده الواحد بيشوفكم يحس إنه محتاج يركب قولون من عند بتاع الأسمنت عشان يتحمل ضغط السنين، وحياة النبى كفاية الواحد بيلاقى صوتكم وكلماتكم العجيبة دى مستشرية فى الجو مش عارفين نلمها، ارحمونا الهى تتستروا كلكم، الواحد لما بيقف يسمعكم بيبقى مش ملاحق على التلوث السمعى اللى حواليه، يعنى معروف إن التلوث الضوضائى  بنقيسه بوحده "الديسيبل" انتم بقى الواحد مش لاقى وحدة مناسبة للقهر اللى بتعملوه ده، انتم بجد محتاجين وحدة تأهيل فكرى عشان توضحلكم حجم اللى انتم بتعملوه فينا.