سما المصرى ردا على شيرين بعد "هيجيلك بلهارسيا": الله يرحم أيام زمان

شنت الفنانة الاستعراضية سما المصرى، هجوما عنيف على الفنانة شيرين عبد الوهاب، بعد ردها على إحدى المعجبات فى حفلها الأخير بلبنان عندما طلبت غناء "ما شربتش من نيلها" لترد شرين: "هيجيلك بلهارسيا".

وكتبت سما عبر حسابها على انستجرام: "إن كنتوا نسيتوا اللى جرى، الله يرحم أيام الكحرتة، الأخت الفنانة شيرين فى واحدة فى حفلة طلبت منها أغنية (ماشربتش من نيلها) فردت عليها وقالت لها (هيجيلك بهارسيا)، اشربى (مياه .... أحسن).

ونشرت سما صورة لشيرين فى بداية مشوارها الفنى، قائلة: "دى صورة الأخت الفنانة شيرين أيام ما كان عندها بلهارسيا، أيام ماكانت بتشرب من ميه النيل قبل ماتتعلم انجليزى وتعرف تقول اسم الميه المعدنيه بالإنجليزى، اللهم يرحم كنتى زمان، وكنتى فاكرة الكريسماس آيس كريم انتى اللى قلتيلى كده فاكره؟".

وتابعت سما: "بصى أنا مش هقولك مصر اللى عملتك ولا مصر اللى نضفتك زى ناس كتير ماهتقولك كده لا سمح الله، لا أنا هقولك ميه البلهارسيا دى بتاعت مصر، عارفه يعنى إيه مصر ولا مش عارفه؟، هى المياه دى اللى خلتك شيرين والعيب مش عليكى العيب على اللى لسه بيقول عليكى فنانة ونجمة وانتى طايحه فى خلق الله، مرة عمرو دياب ومرة شريف مدكور وصوتى لعساف ضد أحمد جمال ابن بلدك".

وأضافت سما: "بصى يابنتى أنا عارفة إنك بتحبى لبنان عشان ماعندهمش بلهارسيا زينا، ريحينا منك ومن لسانك على الناس وعلى مصر اللى بقى يقل أدبه حتى على مصر اللى ربتك وروحى عيشى فى لبنان والله هنكسر وراكى زير، بلد البلهارسيا ماتنفعش تعيش فيها واحدة زيك بتاعت مياه معدنيه وفساتين براندات وبارفانات وحاجات، سيبى دا للغلابة، فاكره مطعم .... اللى فى المنيل اللى نصر محروس اخدك منه وانتى بتغنى هناك بالشبشب أبو ورده؟، لسه موجود المطعم ويشهد انك كنتى مش لاقيه حتى تشربى ميه البلهارسيا لا انتى عارفه كنتى بتشربى مياه إيه".

 

وتابعت: "أيوه هى المياه الصفرا دى هى دى للى كنتى بتشربيها اللى كلها أملاح دى، دى فعلا اللى تليق ليكى، ياتروحى لبنان ياترجعى تشربى المياه الصفراء المملحه يا تعتذرى لمصر، مصر اللى عملت منك فنانه وتعتذرى للمصريين كلهم، ملعون أبو الشهره ياشيخه اللى نستك أصلك وأهلك وبلدك، دا انتى مفيش دم ولا إحساس ولا أى حاجة".

واستطردت سما: "مصر بتمسى عليكى بصورتك القديمة دى وبتقولك اوعى تنسى نفسك لانك لو نسيتى المصريين مابينسوش ، سبحان العاطى الوهاب بعد الشبشب والقبقاب يابنت عبد الوهاب،  لو مش عاجبك البلهارسيا عشان انتى ماتستحقيش تقعدى فى مصر، طبعا الحبيبة هيقولوا لى بصى للبسك الأول، أيوه بلبس كل حاجه وحشه فى نظركم بس لا أهين بلدى واللى يهين بلدى أقطع له لسانه حتى لو آه ياليل، ليل أسود ياشيخه عليكى لما تتريقى على بلدك، اخس على الفلوس اللى بتغير النفوس".