السيسى من كفر الشيخ: "محدش يقدر يمد إيده على حاجة.. والجنيه براجل" (صور)

أكد الرئيس عبد الفتاح السيسي، إن هناك جهودًا تبذل من أجل إزالة التعديات فى بحيرة المنزلة، قائلا: "اتكلمنا إن إحنا هنوصل لتربية مليون رأس وشغالين فى المشروع ده، وفى 200 ألف رأس المفروض يخلصوا 30 يونيو 2018، وهيكونوا الأساس اللى شغالين عليه فى جهاز الخدمة الوطنية".

وأضاف الرئيس السيسي فى كلمته خلال افتتاح عدد من مشروعات التنمية بمحافظة كفر الشيخ، قائلا: "الدولة هى المنفذ لهذه المشروعات، وليست القوات المسلحة، مبينًا: "اللى بتعمل مش القوات المسلحة، والقوات المسلحة تمثل الدولة، يعنى الفريق صدقى بيحط الفلوس فى جيبوه يعنى ولا حاجة؟، قسمًا بالله ما فيه مخلوق يقدر ياخد جنيه"، موجها حديثه للفريق صدقى صبحى وزير الدفاع والإنتاج الحربى، قائلا: "أنا أسف أوعى تزعل من الكلمة دى، مافيش كلام من ده والجنيه براجل، ومايضعش كده، مافيش حد يمد إيده على حاجة، ومايصحش إن إحنا نقول ده جيش، والجيش موجود علشان يساهم فى خطة التنمية كذراع آخر لصالح التنمية فى مصر، نتيجة لحجم المطلوب من الحكومة والقطاع الخاص، لكن أنا قلت نعمل محفز أكبر وندخل القوات المسلحة فى بعض المشروعات اللى بتمس حياة الإنسان، واللى عاوز منتج بسعر معقول، خاصة إن إحنا بنزيد بنسبة كبيرة كل سنة، وبالتالى حجم الطلب هايزيد على السلع الأساسية مثل اللحوم والدواجن والزيت".

وتابع قائلًا: "لو البحيرة اللى كانت 700 ألف فدان نتيجة التعدى وبقت 400 ألف، تفتكروا إن مية مقفولة مابيدخولهاش إلا صيادين مصر بس، تفتكروا كمية السمك اللى بتتطلع منها تبقى الكمية اللى بنتكلم عليها بس، أحنا بنتكلم عن أن المزارع بطلع مليون و700 ألف طن، وكل سواحل مصر بطلع حاجة بسيطة ما تجيش 10 %، ولما أشيل تعدى فى البحر أكيد المواطن هايبقى زعلان، ويقولك يعنى ما تسبنى يا سيسى.. أنا عاوز أسيبك لكن أنا برضه مش هاسيبك.. هاشيل التعدى وهاعمل مكان واستقرار حقيقى.. أنا بعالج السلبيات.. بس انتوا كمان ساعدونى".

وقال الرئيس السيسي، إن رفع كفاءة بحيرة المنزلة ستتكلف من 40 إلى 50 مليار جنيه، طب الفلوس دى تيجى منين، وعلشان ننزل مية صرف غير ملوثة للبحيرة، بنعمل محطة معالجة مياه شرق التفريعة بنحو 5 ملايين متر مكعب معالجة ثلاثية متطورة، طبقا للمعايير العالمية.

ووجه الرئيس حديثه للمصريين قائلا: "بقول للمصريين، أقف جنب بلدك، ماتقفش جنبى أنا، ولما أجى أقولك لو سمحت ماتعملش دى.. لازم تعرف إن مابطلبش منك ده علشان أضرك أو أمنع رزقك، أنا بعمل ده لصالحنا كلنا مش لصالح مجموعة بعينها".

وأشار الرئيس إلى أهمية تأهيل العناصر القائمة على مشروع غليون للاستزراع السمكى، متابعًا: "لابد أن تكون العناصر القائمة بالمشروع مؤهلة للقيام بهذا العمل سواء إدارة أو عناصر تنفيذ داخل المزرعة، علشان نكمل الخطوة التانية وهى المرحلة الثانية من المشروع".