دليلك لخريطة العلاقات الرومانسية فى مسلسل "سابع جار"

فى كام علاقة بنمر بيها مع بداية سن المراهقة لحد الجواز، ويمكن بعد الجواز نمر بمراهقة متأخرة ونحب حد أصغر مننا بكتير، مسلسل "سابع جار" يجمع أكثر عدد من العلاقات والمواقف العاطفية اللى كلنا بنمر بيها فى شخصيات كلنا اتعلقنا بيها، ومن بين العلاقات دى:

فريند زون من غير مأذون

ده اللى حصل بالظبط بين هبة ولؤى، لما قالها "أنتى شدتينى" لكن هبة ماعرفتش ترد تقوله إيه، خاصة إنها ماكنتش بتحبه، ومش بتفكّر فى الحب دلوقتى.

أهرب من مراتى أروح على فين؟!

طارق بيلاقى نفسه مع هبة، وبيشرب معاها حشيش، هبة فاهمة طارق كويس جداً، عشان كده ديماً بيهرب ليها من نكد مراته نهى.

العِشرة والعيال وراحة البال

أما نهى فهى بتحب طارق حب عِشرة، بمنطق ناس كتير فكرت فيه "جوزى وأبو عيالى" ورغم كده مسوّدة عليه عيشته، لدرجة إنها بتحرمه من "ممارسة الحب" معاها.

أوعى متلاقيش اللى تحبه فتحب اللى تلاقيه.. يا إسماعيل

إسماعيل نفسه يستقر، فكان عايز يتجوز دعاء المتدينة، لكن وهو مع دعاء أعجب بواحدة ثانية.. هبة المتحررة أخت دعاء، فساب دعاء وراح قال لهبة إنه معجب بيها، وهبة طبعاً كالعادة مش بتفكر فى الجواز دلوقتى.

خلف الأبواب المغلقة

ديماً فى علاقات بتكون خلف الأبواب المغلقة، ومابيعرفهاش غير خدامات البيوت زى كريمة، وده بالظبط اللى حصل مع أحمد ومى، لما أم أحمد موافقتش إنه يتجوزها، فاتجوز واحدة تانية، وخلف منها عيال، لكنه فضل يعمل مع مى حاجات خلف الأبواب المغلفة.

حب من طرف واحد

عبد الرحمن نفسه يجرب إحساس الحب لكن من سوء حظه وقع فى إيد زميلته فى الدرس سهر.. اللى مقضياها مع شباب ثانوية عامة، ودى كانت أول صدمة فى حياته، ولسه هيمر بصدمات كتير.

عايزة عيال مش عايزة اتجوّز

عشان طبعاً كل الرجالة خاينين، فهالة مش عايزة من الجواز غير إنها تخلّف، وده خلاها تفكّر فى إنها تتجوز على اللى هيموت عليها لمدة 3 أشهر بس، وأول ما تبقى حامل تتطلق.

مسلسل سابع جار ينقل حكايات كتير من واقعنا اللى بنعيشه بتفاصيل مش هتصدقوها، وبيتعرض من السبت للأربعاء الساعة 7 بالليل على CBC والساعة 10 مساء على CBC drama والساعة 6 بالليل على قناة اليوم. 

مسلسل سابع جار