خالد عبد الحميد يكتب: آخر لقطة

نجوم الفن اللى بيتشهروا على كبر فجأة

نجوم الكورة الأبطال المحبوبون

حتى زمايلك الشطار اللى مسكو الإدارة أو اترقو

بعيدا عن فكرة الواسطة والمحسوبية المسيطرة على اذهان البعض

انت متعرفش الناس دى عملت ايه فى الوقت اللى انت كنت فيه نايم ولا بتتفرج على ماتش.. اسمع القصة البسيطة دى

كان فى ولد صغير دايما متمسك بلعبته لانه حاسس انها بتجبلو الحظ

لما كبر شوية بقى عنده قميص بلون معين هو شايف انه بيجبلو الحظ

كبر شوية اغنية معينة حلت مكان القميص

كبر شوية بقى فريق كورة مش بيفوتلو ماتش

لما كبر خالص وبص حواليه ولاقى ناس كتير سبقوه عرف أن العمل الدؤوب والمثابرة فقط هو ما يأتى بالحظ

انت مشفتش البطل الرياضى اللى واقف قصادك تعب اد ايه فى صالات اللياقة البدنية

انت شفت اخر لقطة منظر كرشك وترهلك قصاد عضلات وجسم مشدود.

انت متعرفش اللى تعب وذاكر وقرى وطور نفسه عشان يقف فى المقابلة الشخصية وينتزع الوظيفة عن جدارة، لكن شفت اخر لقطة وسهلتها على نفسك وقلت خدها بالواسطة.

انتى متعرفيش هى صبرت اد ايه وحرمت نفسها من الاكل عشان تبقى شيك ورشيقة.

انتى بصيتى على اخر لقطة وقارنتى وزنك برشاقتها وبعدين ريحتى نفسك وقلتى تلقيها تعبت فخست ولا تلاقيها عيانه.

الابطال بيتقدموا فى حياتهم بالالم والتعب والصبر والاصرار والمثابرة مش بالراحة والمتعة والاسترخاء .

عيش حياتك واتعب وكافح واتحمل دلوقتى وكمل حياتك بعد كده كبطل متوج ينظر لك الجميع بتمنى واكبار .

متركزش على اخر لقطة وتسيب كل ما قبلها.

العلماء ليهم كلمة مشهورة يقولك (زمن الخمول) بيتكلموا على الفترة اللى كان بيكافح وبيذاكر وبيقرى وحابس نفسه عن متع الدنيا كلها

عشان سيادتك تيجى دلوقت وتشوف العلم وقدرته على توصيل المعلومة

عاوز تعرف مين الشخص اللى منعك من النجاح بص فى المراية

عاوز تعرف مين الشخص اللى مهبطك وواقف ضدك بص فى المراية

عاوز تعرف الشخص الوحيد اللى ممكن يساعدك بص فى المراية

عاوز تعرف الشخص الوحيد اللى متقدرش تستغنى عنه بص فى المرايه

عاوز تنجح وتتفوق وتبقى احسن حب وقدر وثق تماما وخلى عندك ايمان مطلق بقدرات الشخص اللى انت شايفه فى المرايه.