سيد منير عطية يكتب: مش متكتف

مش متكتّف بيكى ولكن

قلبى النايم جوّه ضلوعى

هوّ اللى بحبك متكتّف

جايز ييجى قصادى ويحلف

إنُّه ماهوش متأثّر بيكى

ولا بعنيكى

ولا بشفايفك

حتى كمان يعمل مش عارفك

علشان يخدع عقلى ينام

واما دا يحصل ...

يجرى وياخدك بالأحضان

واسمع دقُّه الهامس طالع

دقّه بدقّه يقول هيمان

وامّا يزيد الشوق على شوقُه

فجأة الدق يكون فيضان

طالع ينده بحروف إسمك

يخرج منّى ويرتاح عندك

يمشى وراكى الخطوّه بخطوّة

طول السكّه يتابع ضلك

لو تعترى ف لحظه يضمّك

أو يفرشلك حضنه أمان

إنما رغم داكله لقاكى

أعلنتى عليه العصيان

واتمرّدتى ...

بعتى وخونتى

حتى ف عز ما كنتى حبيبتى

قلبك كان يواعدنى ويخلف

مش متكتّف بيكى ولكن

قلبى اللى بحبك متكتّف

إنما أحلف

بعد اليوم مش ح اترجاكي

ولا رح انام وأسيبه يروحلك

زى الطير ويحوم ف سماكى

ح احبسه جوّه الصدر وح اقفل

ع الدقّات بابى وشبّاكى

والقلب اللى ف يوم دفّاكى

ح يبيعك زى ما بعتيه

و يسيبك ف السكّه الخطره

بردانه وتبكى من المطره

مش ح يسامحك مهما عملتى

ماهو سامحك أكتر من مرّة

ومدام منُّه طلعتى لبرّة

يبقى مكانك ..

مش محجوزلك