"لو ترسمينى وطن" قصيدة جديدة للشاعر سعيد شحاتة

لو ترسمينى وطن.. هاتخيّلك راية

ولا عمرى أقول لك كلام عكس اللى جوّايا

يا خدّ وردى وقوامك خطوته حكايه
البوسه تِسْكر مُريد وكأنها آيه
وانا رغم سنّى وملامحى ولونى وشجوني
مجنون بعشق اللى ساكنه بروحها فى عيونى
وتملّى اشوفك إذا دقّقت فى مرايه

.............

تعرفش ليه يا اسمك ايه قلبى هرب منّي
وإزاى شافوه ع السكك تايه وبيغنّي
تعرفش مستنى مين.. ولامتى مستنّي؟
بردان قوى وجسمى ماشى هناك بعيد عنّي
ونسيتنى ويّاها... ونسيت حلمها معايا
البوسه تِسْكر مُريد وكأنها آيه

.............

إيدى ف إيدين الهوى وإيدك ف إيد الضيّ
يا امّ العيون مركبين رايحين لبكره الجيّ
آه يا بدن مشتعل.. (يا امّ الشفايف نيّ)
قعمزت جنبك عشان... أعمل عليهم شيّ
وامّا اتكويت منّهم أصبحت سهرايه
البوسه تِسْكر مُريد وكأنها آية

...........

إيه الجديد غير كلامى الحلو... دِلّينى
وان يوم عطشت أشربك بالليل وتسقيني
وان يوم عطشتى اشربينى وابقى دَلّيني
وان يوم عصيتك على حبل الوداد لينى
ياسمينى طازه وورودك جدرها عينى
لو هتبوسينى ابقى سمّى وقومى سَمّيني
وان سمّتينى اسندينى وغنّى ويّايه
يا خدّ وردى وقوامك خطوته حكايه
البوسه تِسْكر مُريد وكأنها آيه